MEJD harii ona sentru lima apoiu eskola iha uma
DILI, 19 outubru 2022 (TATOLI)–Programa eskola iha uma ne’ebé Ministériu Edukasaun Juventude no Desportu (MEJD) planeia atu harii sentru hamutuk 130 iha aldeia 222 iha munisípiu Dili, to’o ohin loron harii ona sentru hamutuk lima iha suku rua.
Ministru Armindo Maia hateten, planu ministériu nian to’o fulan remata tinan ida ne’e tenke atinje ona sentru hamutuk 130 enkuantu sentru lima iha munisípiu Dili ativu ona sira nia atividade.
“Ita foin maka harii sentru hamutuk lima iha suku rua; Madohi no Bebonuk, ita nia kalkulasaun iha outubru ne’e tenke harii tan sentru 25 no tinan ne’e remata ita tenke hetan ona sentru hamutuk 130”, Armindo Maia hateten ba jornalista sira hafoin enkontru Konsellu Ministru iha Palásiu Governu, kuarta ne’e.
Nia katak planu ministériu nian hakarak kada aldeia ida tenke instala sentru ida. Tanba ne’e maka ministériu ho autoridade munisípiu Dili servisu hamutuk ho autoridade lokál; xefe suku no xefe aldeia aselera prosesu ne’e, maibé difikuldade sempre iha tanba ne’e maka impede hela prosesu sira.
Nia fiar katak hahú hosi outubru ne’e tenke instala ona sentru 25 depois kontinua tan ba novembru no ikus liu iha dezembru fim anu tenke metade hosi suku sira iha Dili tenke hetan ona sentru ensinu aprendizajen hodi apoiu programa eskola iha uma ba labarik sira.
Nia mós haktuir tan bainhira sentru ne’e estabelese hotu ona, ministériu sei apoia materiál eskola iha uma nian atu fasilita labarik sira hodi aproveita estuda. Enkuantu programa eskola iha uma ne’e tuir esplikasaun ministru nia katak foti hosi programa nasaun seluk nian ne’ebé hanaran homeschooling. Signifika programa eskola iha uma ne’e la loos de’it ona iha sala aula maibé bele realiza iha uma ka bele iha sede suku ka fatin ne’ebé de’it naran katak iha kondisaun atu bele hanorin estudante sira.
Ho modelu ida ne’e hatudu katak la loos ona alunu sira maka ba eskola iha aula laran, maibé mestre sira maka ba iha sentru sira ne’ebé harii ona ne’e hodi hanorin iha ne’ebá, atu nune’e bele evita governu gasta osan barak hodi loke eskola sira maibé alunu laiha.
Notísia relevante: MEJD prevee orsamentu $21.000 ba sentru komunitáriu aprendizajen
Jornalista : Tomé Amado
Editora : Rita Almeida
