iklan

NASIONÁL, KAPITÁL

Santana Diak finaliza konstrusaun moru protesaun mota ulun Becora

Santana Diak finaliza konstrusaun moru protesaun mota ulun Becora

Kompañia Santana Diak Unipesoál, Lda, hodi hahú konstrui moru protesaun ba mota iha aldeia Mota Ulun, suku Becora. Imajen Tatoli/Nelia Fernandes.

DILI, 19 outubru 2022 (TATOLI)—Responsável Empreza Santa Diak Unipesoal, Lda, Fransiano dos Santos Belo, informa daudaun ne’e empreza Santana Di’ak finaliza ona konstrusaun moru protesaun iha mota ulun Becora ne’e atinje ona 100%.

Notísia Relevante: https://tatoli.tl/2022/09/09/konstrusaun-moru-protesaun-ba-mota-ulun-becora-atinje-ona-85/

“Ita-nia konstrusaun moru protesaun ba Mota Ulun Becora ne’e, finaliza ona ho 100%,” Fransiano dos Santos Belo hateten ba Agência Tatoli, iha Mota Ulun Becora, Díli, kuarta ne’e.

Prosesu ba konstrusaun moru protesaun ne’e, hahú iha fulan jullu no ramata servisu iha fulan setembru tinan ne’e ho durasaun fulan rua (2), maske iha kontratu servisu ba konstrusaun moru protesaun ne’e hakerek to’o tinan ida, maibé ami esforsu halo servisu to’o fulan rua (2) finaliza ona,” nia esplika.

Entaun, ba konstrusaun moru protesaun ba Mota Ulun Becora finaliza ho nia medida hosi parte liman karuk nian ho metru 50 no liman kuana metru 256, ho totál medida hamutuk metru 360.

“Antes ne’e iha metru 300, maibé tanba volume liu entaun ami halo liu tiha metru neen (6) ne’e,” nia dehan.

Ho prosesu konstrusaun moru protesaun ne’e finaliza, nia parte garante bainhira udan monu rai karik, volume udan-been no bee-mota ne’ebé suli makaas sei la sobu ka harahun moru protesaun refere.

“Tanba momentu ami chor, teste hotu campuran nune’e mós halo teste iha laboratóriu no sira hosi laboratóriu nasionál Obra Públika mós mai foti sampel hodi ba teste, entaun nia forsa duni,. Tanba ne’e, ami garante bee-mota sei la sobu moru protesaun ne’e,” nia dehan.

Konstrusaun moru protesaun mota ulun Becora atinje 50%-resin

Entretantu, responsável ba Santana Diak no Montana Diak ne’e informa, empreza Montana Diak halo konstrusaun ba moru protesaun ba Mota Ulun Becora daudaun ne’e atinje ona 50%-resin.

Notísia Relevante: https://tatoli.tl/2022/09/09/governu-orienta-kompania-montana-diak-konstrui-moru-protesaun-ba-mota-ulun-becora/

“Ita-nia konstrusaun ba moru protesaun Mota Ulun Becora, agora daudaun to’o ona 50% liu ona,” nia dehan.

Nia informa, prosesu konstrusaun moru protesaun ba Mota Ulun Becora tuir kontratu ne’ebé iha ho durasaun tinan ida (1), maibé empreza esforsu servisu iha fulan ida-nia laran atinje ona 50%.

“Entaun, metas ne’e iha fulan rua (2) konstrusaun ba moru protesaun ne’e bele finaliza,” nia esplika.

Prosesu konstrusaun ba moru protesaun ne’e empreza Montana Diak hahú servisu iha fulan setembru, entaun iha fulan novembru nia laran, konstrusan ne’e bele finaliza ona.

Jornalista : Nelia Fernandes

Editor       : Cancio Ximenes

iklan
iklan

Leave a Reply

iklan
error: Content is protected !!