BOBONARO, 20 outubru 2022 (TATOLI) – Diretór Estatístika Munisípiu Bobonaro, Martinho Gusmão, fó-sai katak sensu polulasaun no uma-kain tinan 2022 dadaun ne’e atinje ona 95% no sei falta área enúmerasaun (EA) hamutuk 14 hosi postu administrativu haat.
Nia hatutan, área enumerasaun 14 ne’e mai hosi postu administrativu Atabae neen kompostu hosi suku Aidabaleten tolu, suku Atabae ida no suku Hataz rua. Hosi parte postu administrativu Bobonaro iha rua mai hosi suku Tebabui no Karabau.
Enkuantu iha postu administrativu Maliana iha lima mai hosi suku Saburai ida, Tapo-Memu ida, Holsa ida no suku Ritabou rua. Postu administrativu Lolotoe falta de’it ida iha suku Opa.
Purtantu iha postu administrativu rua hanesan Balibó no Cailaco mak finaliza ona iha loron 05 fulan-outubru ne’e tanba laiha área enumerasaun.
Notísia relevante: Uma-kain 40% partisipa ona sensu populasaun 2022 iha Bobonaro
“Ita tama tia ona 95% hela de’it área enumerasaun ne’ebé ke ita bolu dehan (EA) + hanesan área ne’ebé enumeradór seidauk foti, ka seidauk finaliza ho nia totál 14,” Diretór Martinho ko’alia iha Maliana, kinta ne’e.
Enkuantu Diresaun Jerál Estatístika rekruta ema atende sensu uma-kain hamutuk 257, komposta hosi enumeradór 158 no supervizór 68 mak rekolla dadus kobre aldeia 193, suku 50 ho nia área mapeamentu enumerasaun 183 iha munisípiu Bobonaro.
Maibé atu finaliza EA+ 14 ne’e iha segunda loron, 17 outubru ne’e diresaun estatístika munisípiu mós estende tán kontratu supervizór no enumeradór na’in-19 atubele kobre EA+ hirak ne’e atubele konklui tuir data ne’ebé determina iha loron 27 fulan-outubru ne’e.
“Ha’u hanoin ida-ne’e klaru, tanba ita-nia kontratu ne’e mai ikus, maibé serbisu ne’e sira halo tiha ona, ita bolu dehan (EA) ne’ebé sira halo kanek tiha ona, aumenta tan loron 10 ba sira-ne’e atu finaliza,” nia katak.
Hafoin finaliza iha EA+ 14 ne’e ekipa sensu mós sei lori formuláriu espesiál ida atu rekolla dadus iha ema sira-ne’ebé hela iha dormitóriu madre sira no estudante sira-ne’ebé hela iha dormitóriu koléjiu Infante de Sagres Maliana ne’ebé hela liuhosi fulan-neen ba leten.
Diretór haktuir, iha sensu 2015 komunidade sira-ne’ebé envolve aan iha Organizasaun CPD-RDRL portvolta 2% mak lakohi fó dadus ba ekipa supervizór no enumeradór sira, maibé iha tinan ne’e maioria komunidade iha konsiénsia partisipa hotu programa ne’e.
“Ha’u dehan Bobonaro ne’e 100%, tanba durante ita la simu kontaktu hosi enumeradór sira dehan, ida-ne’e lakohi fó no ida-ne’ebé lakohi fó, ita (Bobonaro) ne’e partisipa másimu,” nia hateten.
Notísia relevante: Horta husu populasaun fó dadus loloos ba ekipa sensu 2022
Jornalista : Sérgio da Cruz
Editór : Evaristo Soares Martins
