Uma-kain 40% partisipa ona sensu populasaun 2022 iha Bobonaro
BOBONARO, 13 setembru 2022 (TATOLI)—Diretór Estatístika munisípiu Bobonaro, Martinho Gusmão, informa, enumeradór no supervizór sira rekolla ona dadus provizóriu uma-kain kuaze to’o 40% mak partisipa ona sensu populasaun tinan 2022.
Nia haktuir, atividade sensu populasaun iha munisípiu Bobonaro tuir loloos planu atu hahú iha loron 04, fulan-setembru, maibé la konsege tanba loron ne’e Governu deside implementa toleránsia pontu ba funsionáriu no ajente administrasaun Estadu nian iha territóriu nasionál ligadu ho misa ba Don Virgílio Cardeál do Carmo SDB, iha Tasi-Tolu, Dili.
Nune’e atividade refere kontinua fali iha loron 05, fulan-setembru ne’e no tuir kalendáriu sei termina iha loron 05, fulan-outubru tinan ne’e.
Notísia televante: 4 setembru, DGE -MF hahú sensus populasaun no uma kain tinan 2022
“Kuandu ita uza kestionáriu ne’e loraik-loraik sira bele atualiza mai ita, maibé komu sistema online buat ne’e pasa kedas ba server, maibé ha’u bele dehan provizóriu ne’e 35% to’o 40% ita rekolla ona, tanba ita halo tiha semana ida ona,” nia informa ba Jornalista sira, iha kna’ar-fatin, Maliana, tersa ne’e.
Enkuantu Diresaun Jerál Estatístika rekruta ema atende sensu uma-kain hamutuk 257, komposta hosi enumeradór 158 no supervizór 68 mak rekola dadus kobre aldeia 193, suku 50 ho nia área mapeamentu enumerasaun 183 iha munisípiu Bobonaro.
Maibé foin lalais ne’e iha formasaun enumeradór na’in-ida hosi suku Ritabou naran Julião da Costa deside rezigna-aan ho razaun katak nia selesionadu iha vaga Ministériu Edukasaun, Juventude no Desportu (MEJD).
“Ita halo kolokasaun ne’e tuir ninia totál populasaun no uma-kain, ho nia durasaun serbisu fulan-ida. Ha’u hanoin ida-ne’e sé la to’o, diresaun jerál estatístika tenke foti tán medida oinsá atu aumenta tán loron, ne’e sufisiente ka lae, tékniku nasionál mak bele responde,” nia subliña.
Diretór ne’e apela ba komunidade hotu-hotu iha munisípiu Bobonaro atu fornese dadus loloos ba ekipa sensu populasaun no uma kain.
“Ita tenke ser hein, fó informasaun klaru no kredivel, labele subar informasaun. Ezemplu h’au iha karau 10 tenke fó hatene karau 10 duni, sé lae aban bainrua dadus tama laloos, sira pekuária atu mai fó apoia ai-moruk mai hitu de’it karik, ida-ne’e mak problema,” nia apela.
Nia fó sasin, iha sensu uma-kain 2015 liubá tuir loloos munisípiu Bobonaro, Oe-Cuse no Covalima mak hakiak karau-baka barak liu, maibé dadus finál Baucau mak barak-liu fali tanba komunidade sira ladún fornese informasaun bazea ba realidade.
Enkuantu sensu populasaun 2015, ho totál populasaun Timor-Leste hamutuk 1.167.242, kompostu hosi mane 588.561 no feto 578.681.
Enkuantu bazea ba sensu 2010, rejista populasaun territóriu nasionál 1.066.409, komposta hosi mane 544.198 no feto 522.242, ne’ebé hatudu katak durante tinan-lima nian laran populasaun aumenta 100.833.
Notísia relevante: Governu-UNFPA fornese ToT ba funsionáriu 200 rekolla dadus populasaun 2022
Jornalista : Sérgio da Cruz
Editór : Evaristo Soares Martins
