Veteranu 700-resin iha Covalima atu suku uniforme
COVALIMA, 21 outubru 2022 (TATOLI)–Prezidente Konsellu Kombatente Livertasaun Nasionál Covalima, Osorio Soares “Mausoko” hateten, veteranu sira iha Covalima ema 700-resin mak sukat ona no atu suku sira-nia uniforme.
Notísia Relevante: Veteranu Covalima kontribui $155 hodi sukat no suku uniforme
“Ita-nia Veteranu ho grau 8-14, grau 15-19 hamutuk ho martir iha munisípiu Covalima na’in- 700-resin mak hodi sukat no atu suku sira-nia uniforme. Ha’u nu’udar prezidente iha obrigasaun atu fó hanoin ba veteranu sira hodi sukat no suku uniforma,” Osorio Soares “Mausoko” informa ba Agência Tatoli, iha nia kna’ar fatin, Tabakolot, sesta ne’e
Razaun veteranu sira sukat no atu suku uniforme ne’e sai hanesan identidade ida, tanba se veteranu sira laiha uniforma maske naran veteranu maibé laiha idemtidade.
Uniforme ne’ebé veteranu sira sukat no atu suku ne’e, sei uza iha loron nasionál sira hanesan loron nasionál 20 de maiu, 28 novembru no seluk tan nune’e bele hatudu identidade veteran nian.
Uniforme ne’ebé mak veteranu sira sukat no atu suku ne’e kada ema-ida kontribui osan $155 maibé la’ós selu dala ida de’it maibé faze dahuluk kontribui osan $80.00 no hafoin uniforme to’o ona iha Timor-Leste mak sei konstribui tan osan $75.00 ho nune’e total hamutuk $155.
Folin uniforme $155 ne’e tanba kompañia suku ho pakote hanesan kalsa, kamiza, kazaku, gravata no xapeo, ne’ebé ba veteranu sira kór mutin malahuk no mean ne’ebé sei suku iha Indonézia.
Tuir dadus hosi Konsellu Munisipál Livertasaun Nasionál munisípiu Covalima rejista veteranu no martir hosi postu administrative hitu iha Covalima ne’e hamutuk ema 2000-resin.
Jornalista : Celestina Teles
Ediór : Cancio Ximenes
