DILI, 23 outubru 2022 (TATOLI)—Diretór ajénsia viajen, New Generation, ho inisiál FFX, domingu ne’e, submete ona ba primeiru interrogatóriu iha Tribunál Distritál Dili (TDD).
Arguidu FXX to’o iha TDD iha tuku 17:30 lorokraik, ho kondisaun tau aljema iha liman, tau roupa detidu no hetan akompañamentu hosi Polísia Nasionál Servisu Investigasaun Kriminál (PNSIK).
Hafoin deskansa minutu balun iha sela TDD, arguidu submete kedan ba primeiru interrogatóriu iha tuku 17:45.
Tuir observasaun jornalista Agência Tatoli iha terrenu, nota katak arguidu FFX hetan akompañamentu hosi família no membru Grupu Arte Rituál 77 tanba arguidu nu’udar líder ida iha grupu ne’e.
Prosesu primeiru interrogatóriu prezide hosi juíz singulár, Alvaro Maria, Ministériu Públiku (MP) repezenta hosi Prokuradora Lídia Soares no arguidu hetan asisténsia legál hosi Defensór Públiku, Eustaquio Guterres.
Notísia relevante: Ekipa konjunta detein Diretór ajénsia viajen New Generation
Antes ne’e, ekipa konjunta kompostu hosi kompostu hosi PNSIK, Servisu Informasaun Polísia (SIP) Servisu Informasaun Militár (SIM/J2), no Servisu Nasionál Intelijénsia (SIN), iha sesta (21/10), ezekuta mandadu hosi TDD ho Númeru Úniku Kriminál (NUC) 215/22/PNSIK, hodi halo detensaun ba arguidu iha rezidénsia Taibesi tanba deskonfia iha relasaun fasilita timor-oan bá serbisu iha rai-li’ur, ne’ebé kada ema tenke hatama osan $3.000 resin hodi bele desloka bá Portugal, maibé la konsege to’o fatin destinasaun no hasoru problema to’o fila hikas mai Timór.
Nune’e, ekipa konjuta halo detensaun ba arguidu hodi lori kedan ba edifísiu PNSIK Caicoli hodi submete ba identifikasaun no investigasaun, hafoin ramata halo detensaun durante oras 72 molok submete ba primeru interrogatóriu.
Jornalista : Natalino Costa
Editora : Julia Chatarina
