DILI,24 outubru 2022 (TATOLI)—Vise Minsitru Saúde Bonifacio Maucoli dos Reis, informa iha tinan oin (2023), hahú estabelese unidade kardiolojia hodi fó tratamentu ba moras kardiovaskular iha iha rai-laran, nune’e redus hala’o transferésia pasiente ba rai-li’ur.
“Agora, ita nia preparasaun besik hala’o ona, tanba ne’e janeiru tinan oin ita ofisializa no bele halo ona tratamentu ka operasaun ba pasiente kardiovaskular iha Timor-Leste. Daudaun ami diskute hela ba preparasaun ténkniku, liuliu ba iha infraestrutura ne’ebé mak halo iha ospitál Lahane hodi halo operasaun nian nomós estabelesimentu ba ekipamentu cat lab nian”, hatete Vise MS Maucoli ba Agência TATOLI iha HNGV, segunda ne’e.
Notísia relevante: Komisaun F rekomenda ba MS aselera estabelese unidade kardiolojia
Nune’e, nia kompromete hahú hosi janeiru 2023 bele halo ona operasaun ba pasiente ne’ebé sofre kardiovaskular iha rai-laran.
Kona-ba rekursu umanu, nia dehan MS prepara ona médiku espesialista no kontrata mós Hospitál iHeal Malázia hodi mai akonpaña durante tinan lima ka sanolu nia laran atu bele operasionaliza mákina no ekipamentu sira hodi halo operasaun.
“Tanba ita nia rekursu umanu, liuliu halo operasaun ne’e ita haruka ba halo estudu iha rai-li’ur atu nune’e bele hasai espesializasaun ba kardiovaskular nian”, katak.
Ministériu saúde mós prevee ona orsamentu iha tinan kotuk ho montante rihun $500 atu halo akizasaun ba ekipamentu, ne’ebé to’o ona Timor-Leste atu halo instalasaun.
“Tinan 2023, ita nafatin tau orsamentu milliaun $1 atu kontinua sosa ekipamentu moras fuan nian hodi halo tratamentu iha rai laran”, nia kompromete.
Durante ne’e, Ministériu Saúde halo transferénsia ba pasiente ba rai-li’ur no kada tinan gasta milliaun $12, nune’e Governu hahú investe iha rekursu umanu liuhusi formasaun espesialista atu bele halo operasaun iha rai-laran hodi poupa orsamentu.
Notísia relevante: Ospitál iHeal Malázia hakarak apoia MS harii sentru kardiolojia
Jornalista : Felicidade Ximenes
Editór : Florencio Miranda Ximenes
