DILI, 24 outubru 2022 (TATOLI)— Prezidente Repúblika, José Ramos Horta, segunda ne’e, hala’o audénsia ho Diretór Ezekutivu Empreza hosi Singapura Kacific Broadband Satellite, Christian Patouroux, hodi ko’alia kona-ba empreza nia hakarak halo investimentu iha setór satélite ínternet iha Timor-Leste.
“Ami hakarak mai investe iha Timor-Leste, liuliu lori satélite ínternet ho lais hosi Singapura mai Timor-Leste ho nia montante osan miliaun $5”, dehan Cristian hafoin hasoru malu ho Prezidente Repúblika iha Palasiu Prezidensiál, Bairru-Pité, segunda ne’e.
Nia dehan, bainhira prosesu ne’e la’o ona mak sei fó oportunidade di’ak ba ekonomia Timor – Leste nian.
Na’in ba kompaña ne’e reforsa tan, bainhira satélite ne’e lori ona mai Timor-Leste mak sei tulun Governu hala’o servisu ne’ebé di’ak iha área ekonomia, indústria no seluk tan ne’ebé ligasaun ho teknolojia.
Ho nune’e Prezidente Repúblika, José Ramos Horta, apresia inisiativa ne’e no tau iha nia prioridade nu’udar Xefe Estadu hodi diskute hamutuk ho Governu hafoin foti desizaun.
Tanba Tuir Xefe Estadu katak investimentu ne’e di’ak tebes ba Timor-Leste hodi bele ajuda ema hotu asesu ba ínternet ne’ebé lais.
Notísia relevante: Empreza hosi Singapura hakarak investe iha setór aéreu
Jornalista: Hortencio Sanchez
Editór : Florencio Miranda Ximenes
