Estudante finalista 3.296 Viqueque partisipa ezame nasionál
VIQUEQUE, 24 outubru 2022 (TATOLI)—Estudante finalista tinan 2022 hosi nível báziku to’o sekundáriu iha Viqueque hamutuk 3.296, segunda ne’e, partisipa iha abertura ezame nasionál.
“Estudante finalista iha Viqueque kompostu hosi Eskola Ensinu Báziku Sentrál (EBC, sigla portugés) 1.897, Eskola Ensinu Sekundáriu Jeral (ESJ) 1.306, no Eskola Ensinu Sekundariu Tékniku Vokasionál (ESTV) 93,” Diretór Servisu Edukasaun munisípiu Viqueque, Emídio Amaral, hateten hafoin ramata abertura ezame nasionál, iha Eskola ESJ Liceu 04 setembru, Viqueque vila, segunda ne’e.
Diretór ne’e otimista estudante sira bele prenxe pontu ezame ho di’ak hodi hetan valór di’ak, nune’e bele kontinua estudu iha universitáriu.
Notísia relevante: MEJD enkoraja estudante esforsu-an hetan rezultadu di’ak iha ezame nasionál
Iha fatin hanesan, Diretór ESJ Liceu 04 setembru Viqueque, Veíssimo Marques da Silva, dehan, preparasaun ezame nasionál la’o di’ak no iha tinan kotuk estudante sira pasa 100%, maibé iha tinan ne’e depende ba estudante sira-nia preparasaun.
Tuir observasaun jornalista Agência Tatoli, durante ezame iha Eskola ESJ Liceu 04 setembru, estudante finalista 279 okupa sala 15 no kada sala prienxe estudante 20.
Serimónia abertura ezame nasionál ne’e partisipa hosi inspetór edukasaun Viqueque, koordenadór ezame nasionál munisípiu Viqueque inklui profesór sira.
Ezame nasionál realiza iha loron 24 to’o 27 outubru, hahú tuku 8:00 dadeer to’o ramata.
Jornalista : Vitorino Lopes da Costa
Editora : Julia Chatarina
