iklan

EKONOMIA, HEADLINE

MTKI inisia sentru produsaun tais no loja souvenir iha Covalima

MTKI inisia sentru produsaun tais no loja souvenir iha Covalima

Ministru Turizmu Komérsiu no Indústria, José Lucas do Carmo da Silva. Imajen Tatoli/Egas Cristóvão

DILI, 24 outubru 2022 (TATOLI)–Ministériu Turizmu Komérsiu no Indústria (MTKI) liuhosi Diresaun Nasionál dezenvolvimentu Turístiku, iha sábadu (22/10), halo ona lansamentu fatuk dahuluk ba konstrusaun sentru produsaun tais no loja souvenir iha suku Suai Loro, postu administrativu Suai Vila, munisípiu Covalima.

Ministru Turizmu Komérsiu no Indústria, José Lucas dos Carmo da Silva, hateten, objetivu harii sentru ne’e tanba bazeia ba Planu Estratéjiku Dezenvolvimentu Nasionál (PEDN) 2011-2030 ne’ebé mensiona iha setór dezenvolvimentu, relativamente iha setór turizmu no diversifikasaun ekonomia, infraeatrutura ne’ebé ho kualidade.

“Sentru tais ho loja souvenir ne’e importante tebes, ne’ebé aposta ona iha VIII Governu konstitusionál. Ministériu iha planu atu hamosu espasu komersiál ba artezenatu ne’ebé bele akomoda nesesidade ba promosaun turizmu no diversifikasaun ekonomia, liuliu sentru produsaun tais ne’e atu haforsa kualidade tais,” Ministru José Lucas, hateten iha Palásiu Governu, segunda ne’e.

Notísia relevante: RAEOA prepara grupu feto aprezenta produtu tais iha festivál Kefamenanu

Nia dehan, MTKI inisia programa ne’e tanba UNESCO deklara ona katak tais hanesan produtu patrimóniu nasionál, tanba ne’e liuhosi sentru produtivu tais ne’e bele halibur tais Orijen Covalima hamutuk, ne’ebé sei hatudu ba munisípiu seluk no ba mundu.

“Hakarak tais kualidade hanesan souvenir bele hetan iha loja souvenir Suai Loro no Governu liuhosi Ministériu Turizmu Komérsiu no Indústria sei nafatin lolo liman hodi fasilita komunidade atu hasa’e produsaun tais,” nia akresenta.

Empreza manán-na’in ba konstrusaun sentru ne’e maka Unidade Unipessoal Lda.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!