DILI, 24 outubru 2022 (TATOLI)–Sekretáriu Jerál Timor-Leste Press Union (TLPU), Zezito Silva, ezije Komandante Polísia Nasionál Timor-Leste (PNTL) atu hatun despaixu ba Polísia Servisu Investigasaun kriminál atu anula karta notifikasaun ba jornál Independente, tanba liuhosi dalan ne’e mak bele garante liberdade imprensa.
Sekretáriu Jerál TLPU ko’alia asuntu ne’e, relasiona ho Jornál Diáriu Independente ne’ebé simu karta notifikasaun hosi Polisia Nasionál Timor-Leste (PNTL) liuhosi Servisu Investigasaun Kriminiál, ho númeru ofísiu 112/Gab/CHEFE/SIC/PNTL/X/2022, ho nia karáter “Urjente” atu halo identifikasaun ba jornalista Domingos Gomes no Xefe Redasaun Jornal Diáriu Independente, Jorginho Dos Santo, tuir kódigu Prosesu Penál artigu 53 tanba deskonfia komete krime.
“Ami TLPU Ezize ba Komandante PNTL, Komisáriu Faustino da Costa, ho tempu urjente orienta ka hatun despaixu ida ba Polísia Servisu Investigasaun Kriminál hodi anula karta notifikasaun ne´ebé atribui ba Jornál Diáriu Independente, tanba só úniku dalan ne’e mak bele garante Liberdade Imprensa ne’ebé konsagra ona iha Konstitusaun Repúblika Demokrátika Timor-Leste,” Zezito Silva hateten ba jornalista sira liuhosi konferénsia imprensa, iha sede TLPU, Taibesi, Dili, segunda ne’e.
Ho karta notifikasaun ne’e, TPLU sente triste tanba karta hosi Instituisaun Estadu hanesan PNTL ne’ebé lidera hosi Komisáriu Faustino da Costa, bele uza fali kódigu prosesu penál artigu 53 hodi krimináliza fali obra jornalístiku.
Tanba, tuir nia, ho artigu 53 ne’e TLPU konsidera PNTL ne’ebé lidera hosi Komisáriu Faustinho da Costa, hakarak hamate prinsípiu Liberdade Imprensa no la respeita desizaun Estadu Timor-Leste ne’ebé hili loron 16 outubru hanesan loron nasionál Liberdade Imprensa nian.
Nune’e mós. TLPU sente triste tanba karta notifikasaun ne’e mosu iha momentu ne’ebé Timor-Leste nia índíse Liberdade Imprensa ne’e hetan di’ak hosi númeu 71 ba 17, ne’ebé loloos Timor-Leste sente orgullu maibé iha momentu hanesan PNTL uza kódigu prosesu Penál hodi kriminaliza obra jornalístiku.
Tanba ne’e, TLPU ezije ba Komandante Servisu Investigasaun Kriminál atu halo kanselamentu ba identifikasaun, ne’ebé sei hala’o iha loron 24 outubru, tanba bele hamate integridade PNTL nu’udar instituisaun seguransa iha país demokrátiku ne’e.
TLPU ezije ba PNTL katak notísia rua ne’ebé públika iha Jornal INDEPENDENTE mak halo ema ruma vítima ka ho faktu balun la loos bele uza direitu resposta no retifikasaun ho baze ba lei komunikasaun sosiál artigu 2 iha aliña F katak “Direitu hodi halo loos”, direitu ba ema singulár ka koletivu ida-idak hodi halo loos notísia ne’ebé publika ka fó-sai faktu be laloos kona-ba nia.
Iha biban ne’e. TLPU mós konsidera Conselho de Imprensa (CI) “Falla” halo sensibilizasaun lei Komunikasaun Sosiál 5/2014, ba Instituisaun Estadu sira liuliu PNTL hodi uza direitu resposta no retifikasaun.
“Nune’e husu CJ atu kontinua ativa hodi halo sensibilizasaun atu sidadaun hotu bele hatene no labele kriminaliza jornalista ho nia obra jornalistiku,” nia dehan.
TLPU husu ba Públiku tomak katak jornalista ne’e la’ós krime, tanba ne’e bainhira sidadaun sente katak servisu jornalizmu iha buat ruma la loos, Lei Komunikasaun Sosiál nian iha atu rezolve no halo mediasaun, la’ós lori kódigu prosesu penál akuza jornalista tanba de’it ninia obra jornalístika.
Notísia Relevante: Kazu Komandu PNTL notifika Independente, AJTL sei haruka karta ba Xefe Estadu
Jornalista : Osória Marques
Editór : Cancio Ximenes
