DILI, 25 outubru 2022 (TATOLI)—Primeiru-Ministru (PM), Taur Matan Ruak, tersa ne’e, bolu Ministériu Obra Públika (MOP) hodi ko’alia kona-ba progresu projetu enerjia renovável inklui estrada no ponte iha territóriu laran.
“Kona-ba enerjia renovável ne’e Eletrisidade de Timor-Leste, Empreza Públika (EDTL, E.P,) no MOP halo hela preparasaun, nia progresu daudaun ne’e Governu serbisu hamutuk no hetan apoiu hosi Banku Dezenvolvimentu Aziátiku (ADB, sigla ingés) ba operasaun dezenvolvimentu enerjia renovável iha Timor-Leste,” Ministru informa iha Palásiu Governu, tersa ne’e.
Governante ne’e dehan, poténsia boot liu mak enerjia loro-matan solár no koorelasaun serbisu di’ak liután atu haree implementasaun projetu sira ne’ebé hetan fundu apoiu hosi empréstimu no fundu infraestrutura.
Notísia relevante: EDTL promete populasaun tomak asesu enérjia elétrika iha 2023
Aleinde ne’e, MOP serbisu hamutuk ho Konsellu Administrasaun Fundu Infraestrutura (KAFI) no Ministériu Finansa (MF) aselera hela serbisu implementasaun fundu infraestruta liuliu hanesan prepara atu introdús ekipa dedikadu atu haree implementasaun projetu sira ne’ebé iha fundu infraestrutura nia-laran.
“Agora ita iha Project Managemment Unit (PMU) ba fundu empréstimu sira no haree ba esperiénsia ida-ne’e ita atu kria mós PMU dedikadu hodi haree implementasun ba projetu fundu infraestrutura hodi aselera ekipa dedikadu halo implementasaun,” nia akresenta.
Aleinde ne’e, Primeiru-Ministru oriente MOP hodi aselera projetu sira ne’ebé liga ba komunidade nia moris hanesan estrada no ponte.
“Ha’u releta kona-ba preparasaun lubuk ida ne’ebé ministériu halo liuliu estrada lubuk ne’ebé daudaun ne’e iha prosesu konkursu públiku hodi halo dezeñu hanesan estrada iha Ermera, Letefoho, hosi Bobonaro tun fali ba Zumalai, Bobonaro ba Suai hosi postu Maukatar, estrada nasionál iha fronteira hosi Bobonaro to’o Fatu-lulik, Fatu-mea to’o Tilomar, no estrada iha Maubisse, Turiskai ba Laklubar,” nia tenik.
Jornalista : Arminda Fonseca
Editora : Julia Chatarina
