iklan

EDUKASAUN, HEADLINE

Estudante finalista 201 iha Dili auzénsia iha ezame nasionál

Estudante finalista 201 iha Dili auzénsia iha ezame nasionál

Ilustrasaun ezame. Imajen/Espesiál

DILI, 25 outubru 2022 (TATOLI)–Diresaun Servisu Edukasaun Munisípiu Dili (DSEMD) rejista dadus provizóriu estudante finalista hosi nível Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV) iha Dili hamutuk 201 mak auzénsia iha ezame nasionál.

“Dadus ne’e seidauk kompletu tanba sei falta estudante finalista hosi ensinu báziku terseiru siklu mak seidauk haruka mai. Totál estudante finalista hosi ensinu tolu iha Dili hamutuk 16.575, kompostu hosi Ensinu Báziku 6.804, Ensinu Sekundáriu Jerál 8.790 no Tékniku Vokasionál 1.071,” Diretór Servisu Edukasaun Munisípiu Dili, Carlito da Silva, informa iha ninia knaar fatin, iha Comoro, tersa ne’e.

Notísia relevante: MEJD enkoraja estudante esforsu-an hetan rezultadu di’ak iha ezame nasionál

Nia dehan, estudante finalista Ensinu Báziku iha 6.804 maibé parte eskola seidauk manda dadus identifikasaun estudante ne’ebé la partisipa ezame nasionál, enkuantu ESJ no ESTV nia totál estudante 1.071 maibé estudante ne’ebé tuir ezame nasionál hamutuk 1.051.

“Signifika iha estudante finalista auzénsia18, iha rua moras no laiha informasaun 16, ho nune’e taxa partisipasaun estudante ekivalente 98,3%,” nia akresenta.

Nune’e mós, estudante finalista ESJ iha 8.790, maibé iha 183 auzénsia, moras 14 no laiha informasaun 169.

“Ho nune’e hela de’it estudante 8.607 maka partisipa iha ezame nasionál, enkuantu taxa partisipasaun estudante ESJ iha munisípiu Dili ekivalente 97,64%,” nia tenik.

Tuir Diretór, parte Ministériu Edukasaun Juventude no Desportu (MEJD) fó nafatin oportunidade ba estudante sira ne’ebé auzénsia iha ezame nasionál faze dahuluk, nune’e bele partisipa iha faze daruak iha edifísiu MEJD.

Jornalista   : Tomé Amado   

Editora        : Julia Chatarina

iklan
iklan

Leave a Reply

iklan
error: Content is protected !!