Prezidente AFP Viqueque enkoraja feto partisipa iha prosesu dezenvolvimentu
VIQUEQUE, 25 outubru 2022 (TATOLI)–Prezidente Asosiasaun Feto Potensiál (AFP) munisípiu Viqueque, Luciana Guterres, enkoraja feto maluk sira iha munisípiu Viqueque atu partisipa iha prosesu dezenvolvimentu.
“Ha’u nafatin enkoraja no aprosima feto maluk sira atu labele tauk ba ita-nia papel. Mai ita hamutuk luta ho mane sira hodi dezenvolve papel feto no serví nasaun doben ne’e, liu-liu iha munisípiu Viqueque,” Prezidente asosiasaun hateten iha salaun administrasaun, tersa ne’e.
Nia dehan, atu partisipa dezenvolvimentu feto tenke asume kargu hanesan xefe suku no xefe aldeia hodi foti desizaun ruma ba prosesu dezenvolvimentu no serví Estadu.
“Ami hakarak eleisaun períodu mai ne’e feto barak tenke kompete ba xefe suku no xefe aldeia tanba oportunidade ida-ne’e la’ós ba mane de’it, maibé ami feto mós hola parte nune’e ami brani no prontu atu kompete ho mane sira. Ami sei esforsu iha tinan 2023 bainhira iha eleisaun ba xefe suku no xefe aldeia, ha’u husu feto maluk sira bele kandidata-an ba xefe suku hodi kompete ho mane sira ba líder xefe suku no xefe aldeia. Nune’e ami sei luta maka’as liután ba feto nia partisipasaun iha dezenvolvimentu,” nia akresenta.
Notísia relevante: Governu rekuiñese feto seidauk partisipa másima iha dezenvolvimentu suku
Aleinde ne’e, sei iha mós kapasitasaun ba feto potensiál Viqueque kona-ba lideransa, ne’ebé sei realiza iha postu administrativu lima to’o suku hodi feto maluk sira partisipa iha nível lokál hodi bele foti desizaun.
“Durante ne’e ami asosiasaun feto potensiál munisípiu Viqueque fó kapasita ba feto sira kona-ba lideransa, oinsá hamrik iha oin hodi ko’alia no foti desizaun ba an liga ba moris,” nia tenik.
Iha eleisaun xefe suku iha tinan 2016, feto hosi asosiasaun munisípiu Viqueque hamutuk 37 kompete ba xefe suku no xefe aldeia, maibé feto ida maka konsege manán sai xefe suku Bibileo no feto ida sai xefe aldeia.
Jornalista : Vitorino Lopes da Costa
Editora : Julia Chatarina
