DILI, 25 outubru 2022 (TATOLI)—Ajénsia Teknolojia Informasaun no Komunikasaun (TIC Timor, I.P, sigla portugés) no Sekretaria Estadu Ambiente (SEA), tersa ne’e, introdús website ambiente ho naran ‘Timor-Leste Environment Data Portal’, ho enderesu https://timorleste-data.sprep.org/, ne’ebé la’o iha plataforma online.
Sekretáriu Estadu Ambiente, Demétrio do Amaral de Carvalho, hateten, website ne’ebé lansa ho objetivu atu fahe informasaun atividade, asegura informasaun SEA no iha tempu hanesan komemora loron nasionál ambiente ne’ebé kada tinan monu iha loron 25 outubru.
“Ita lansa website ne’e ho objetivu atu fahe informasaun hotu relasiona ho atividade SEA inklui kuidadu informasaun hotu ne’ebé ita peskiza no rai hela, tanba relatóriu informasaun detallu sira dalaruma ita buka laiha fatin,” Sekretáriu Estadu Demétrio hateten iha salaun Orchid Room, Timor Plaza.
Nia dehan, selebrasaun nota entedimentu entre SEA no TIC Timor importante tanba instituisaun Estadu ne’e nu’udar entidade ne’ebé servisu dezenvolve sistema informátika nasionál inklui polítika sira ne’ebé iha relasaun ho baze dadus.
“Kontente tebes bele selebra nota entendimentu. Espera kooperasaun ne’e bele fó benefísiu ba ita tanba ita hakarak evita lakon jestaun informasaun. Espera iha kondisaun di’ak liu hodi bele konserva ita-nia informasaun sira,” nia akresenta.
Notísia relevante: Governu altera dekretu-lei importasaun veíkulu asegura protesaun konsumidór no meiu ambiente
Hosi website ne’e, bele disamina informasaun ambientál ba públiku, liuliu kona-ba mudansa klimátika no kontrola servisu sira ne’ebé ambiente oferta hanesan lisensiamentu ambientál inklui mekanizmu seluk ne’ebé ambiente bele oferese ba públiku.
“Ita sei fó informasaun ba públiku kona-ba protesaun ambiente no sei halo parte ba movimentu ida hodi proteje ambiente. Atu dehan katak nia benefísiu mak atu salva guarda planeta rai. Hotu-hotu hatene katak planeta rai agora hosoru problema boot tanba kresimentu populasaun, presaun rekursu, no ohin loron fábrika sira halo desmatamentu boot ba floresta mundiál nian,” nia dehan.
Iha fatin hanesan, Diretór Ezekutivu TIC Timor, I.P, Roberto Caetano de Sousa Vicente, hateten, sistema ne’ebé sira oferese ba SEA no instituisaun Estadu sira seluk nu’udar sistema ne’ebé seguru no garante ema sei la estraga.
“Sistema ne’ebé ita estabelese ne’e seguru. Bainhira iha tentativa atu tama ka estraga sistema sira ne’e ita asegura ona ho mekanizmu ne’ebé mak enkripsaun, katak ita boot sira haree iha website ne’e hafoin lansa, ita tau la’ós http maibé https, signifika seguru,” nia esplika.
Jornalista : Arminda Fonseca
Editora : Julia Chatarina
