AIFAESA, I.P deteta produtu liu prazu no tabaku ilísitu durante halo inspesaun
DILI, 26 outubru 2022 (TATOLI)–Ekipa Autoridade Inspesaun no Fiskalizasaun Atividade Ekonomia Sanitária no Alimentár, Institutu Públiku (AIFAESA, I.P) halo atividade inspesaun ba empreza Masud Enterprise Unip, Lda ne’ebé fa’an produtu liu prazu no fa’an tabaku ilísitu.
Xefe Sub Inspetór Jerál AIFAESA, I.P, Dionísio Neto da Silva, hateten, ekipa inspesaun deteta produtu liu prazu hanesan susuben formula ho marka Lactogen 2 kaisa 7, tabaku ílisitu hanesan Surya 12 masu 19, Esse masu tolu no Arrow black hamutuk lulun 12.
“Ita-nia ekipa foin lalais halo inspesaun rutina ba atividade komersiante sira no konsege deteta iha empreza balu hanesan Masud Enterprise Unip, Lda fa’an sasán liu prazu inkui mós fa’an sigaru ilísitu ne’ebé Governu bandu,” Xefe Sub Inspetór Jerál hateten ba Agência Tatoli via telefónika, kuarta ne’e.
Notísia relevante: AIFAESA rekolla reseita $75.300 durante fulan-hitu
Nia dehan, bainhira ekipa deteta, inspetór sira foti de’it auto notísia kontra ordenasaun ba prosesu tomak no sei submete fali ba parte jurídika AIFAESA hodi Inspetor Jerá halo desizaun finál tuir lei.
Tuir lei empreza sira ne’ebé fa’an produtu expiradu sei prosesa tuir dekretu-lei númeru 23/2009, 05 agostu, kona-ba rejime infrasaun administrativa kontra ekonomia no seguransa alimentár.
“Bele selu koima ka multa mínimu $1.000 no másimu $5.000 bainhira fa’an produtu hanesan tabaku ilísitu sei prosesa tuir dekretu-lei númeru 14/2016, 08 juñu, kona-ba rejime kontrolu ba tabaku bele selu koima ka multa mínimu $70 no másimu $1.000,” nia dehan.
Nune’e, koima ne’ebé empreza sira sei selu tuir infrasaun ne’ebé komete, ne’ebé bainhira ekipa AIFAESA deteta la’ós haruka sira selu kedas iha momentu identifika irregularidade ne’e maibé tuir dalan legál.
Empreza Masud Enterprise lokaliza iha suku Caicoli, postu administrativu Vera Cruz, munisípiu Dili.
Jornalista : Arminda Fonseca
Editora : Julia Chatarina
