DILI, 18 agostu 2022 (TATOLI)–Autoridade Inspesaun no Fiskalizasaun Atividade Ekonómika no Alimentár, Institutu Públiku (AIFAESA, I.P) rekolla reseita hosi atividade ekonómika ba kofre Estadu hamutuk $75.300 durante fulan-hitu.
Xefe Gabinete Inspetór Jerál AIFAESA, Filipe Gomes, hateten, autoridade rekolla reseita bazeia ba dekretu-lei 26/2016 no artigu 16, ne’ebé fó kompeténsia hanesan autoridade inspesaun ne’ebé kompeténsia tomak halo kontrolu ba atividade ekonómika iha territóriu nasionál.
“Ita konsege rekolla reseita hosi atividade ekonómika hamutuk $75.300, hahú hosi janeiru to’o jullu 2022. Reseita ne’ebé AIFAESA, I.P rekolla bazeia ba nia kompeténsia hahú hosi tinan 2017 to’o 2022 no konsege rekolla ona reseita $551.890,” Xefe Gabinete Inspetór Jerál AIFAESA informa ba Agência Tatoli, iha ninia knaar fatin, Matadouro, kinta ne’e.
Notísia relevante: AIFAESA identifika empreza balun fahe produtu Cesta Bázika ladun kualidade
AIFAESA rekolla reseita liuhosi prosesu konta ordenasaun maibé iha mós empreza balun maka la kumpre desizaun finál autoridade.
Aleinde ne’e, autoridade konsege prosesa empreza 18 ba Ministériu Públiku hahú hosi janeiru to’o jullu 2022 tanba viola regra atividade ekonómika.
“Ita prosesa empreza ba Ministériu Públiku no halo ona pagamentu koima hamutuk 116.000,” nia akresenta.
Autoridade hetan reseita liuhosi prosesa empreza bazeia ba atividade komérsiu, indústria no turístika.
Jornalista : Arminda Fonseca
Editora : Julia Chatarina
