iklan

EDUKASAUN, HEADLINE

Estudante finalista 43 hosi Liquiçá auzénsia hosi ezame nasionál

Estudante finalista 43 hosi Liquiçá auzénsia hosi ezame nasionál

Ilustrasaun ezame. Imajen/Espesiál

DILI, 26 outubru 2022 (TATOLI)–Estudante finalista 43 iha munisípiu Liquiçá auzénsia iha ezame nasionál ne’ebé realiza iha loron 24 to’o 26 outubru 2022.

“Eskola hetan koñesimentu kona-ba kondisaun saúde estudante rua. Estudante ida hosi ensinu báziku tanba hetan asidente no estudante ida hosi ensinu sekundáriu jerál moras bainhira iha ona eskola atu tuir ezame nasionál, entaun eskola foti desizaun haruka nia filafali. Enkuantu 41 seluk to’o agora laiha informasaun,” Diretór Servisu Edukasaun munisípiu Liquiçá, Carlos Lopez, hateten ba Agência Tatoli, via telefónika, kuarta ne’e.

Tuir Diretór, parte eskola nunka hatene estudante 41 nia paraderu desde ezame segundu períodu.

“Tanba ne’e, estudante 41 ne’ebé auzénsia sei lakon direitu iha ezame nasionál segundu xamada. Ita sei fó de’it oportunidade ba estudante rua ne’ebé moras maka sei filafali atu tuir ezame nasionál iha segundu xamada maibé sira sei tuir iha edifísiu Ministériu Edukasaun Munisípiu Liquiçá,” nia tenik.

Notísia relevante: Estudante finalista 201 iha Dili auzénsia iha ezame nasionál

Hosi dadus inísiu, estudante finalista hosi ensinu báziku no ensinu sekundáriu jerál no tékniku vokasionál ne’ebé atu partisipa iha ezame nasionál hosi Liquiçá hamutuk 3.042, maibé bainhira tama ba ezame dadus iha de’it estudante 3.038.

Ho nune’e, totál estudante ensinu báziku 1.786 maibé sira ne’ebé tuir ezame nasionál iha 1.769 enkuantu estudante auzénsia 17, hosi ensinu sekundáriu jerál iha estudante 1.121, kompleta ezame nasionál iha 1.109 no auzénsia 12, hosi ensinu sekundária tékniku vokasionál iha estudante 128 maibé na’in-116 de’it maka partisipa iha ezame nasionál no auzénsia 12.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!