DILI, 26 outubru 2022 (TATOLI)–Governu liuhosi reuniaun Konsellu Ministru (KM) aprova projetu proposta rezolusaun Parlamentu Nasionál (PN) rua, ne’ebé aprezenta hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, ba aprovasaun akordu servisu aéreu entre Repúblika Demokrátika Timor-Leste ho Repúblika Indonézia no Repúblika Singapura.
“Akordu hirak ne’e iha objetivu prinsipál atu garante realizasaun voo komersiál regulár entre Timor-Leste ho Indonézia no Singapura, ho hanoin atu promove dezenvolvimentu iha setór ekonómiku, komersiál no turizmu país hirak ne’e,” Ministru Prezidénsia Konsellu Ministru, relata hafoin ramata reuniaun ezekutivu ne’e, iha Palásiu Governu, kuarta ne’e.
Notísia relevante: Akordu Aéreu ho Austrália, Ministra Adaljiza: “ Timor-Leste Nakloke-an ba Empreza Aéreu”
Akordu servisu aéreu sira ne’e bainhira aprova ona hosi Parlamentu Nasionál mak sei notifika nasaun ne’ebé selebra akordu ho Timor-Leste hodi hahú ona implementasaun.
“Realidade ida maka aviaun Qantas, dadaun halo operasaun bá-mai Austrália-Timór, regulariza mós aviaun ligasaun ho nasaun viziñu sira. Espera katak situasaun komesa di’ak liu ona no mundu hahú hikas atividade ekonómiku sira, ita bele normaliza hotu atividade voo komersiál,” nia akresenta.
Foin lalais, Governu aprova akordu servisu aéreu ho Cambódia ne’ebé selebra ona akordu iha Cambódia iha ámbitu vizita Estadu, Prezidente Repúblika, José Ramos Horta, hamutuk ho delegasaun MNEK.
Jornalista : Antónia Gusmão
Editora : Julia Chatarina