DILI, 26 outubru 2022 (TATOLI)–Institutu Apoiu Dezenvolvimentu Emprezariál (IADE), kuarta ne’e, realiza kompetisaun planu negósiu inovativu setór turizmu tinan 2022, ho partisipasaun hosi kandidatu selesionadu na’in-10.
“IADE kada tinan sempre realiza kompetisaun negósiu inovativu, ne’ebé iha tinan ne’e ami hili setór turizmu mak sai setór importante atu joventude sira hola parte iha kompetisaun. Prosesu ne’e ami lansa ona iha loron 22 fevereiru 2022 no kompetisaun loke ba joventude hotu ne’ebé hakarak atu sai emprezáriu, ne’ebé sira iha ideia de’it, enkuantu kapasidade ein termu finanseiru, ekipamentu no fasilidade seluk laiha. Ho ida ne’e maka IADE hanoin atu kanaliza sira atubele implementa sira-nia ideia, entaun IADE loke oportunidade ne’e,” Diretór Ezekutivu IADE, Filomeno Marcelino Belo, hateten iha ámbitu serimónia kompetisaun planu no negósiu ne’ebé hala’o iha Timor Plaza.
Juri ba kompetisaun ne’e mai hosi reprezentante emprezáriu nasionál, akademista, no reprezentante hosi banku.
Nia dehan, kompetitór selesionadu tanba priense kritériu hosi IADE, ne’ebé sira-nia ideia inovativu no iha negósiu.
“Ami fó prioridade ba manan-na’in tolu, signifika hosi na’in-10 ne’e ami sei hili fali na’in-tolu ne’ebé di’ak liu mak sai vensedór dahuluk, daruak no datoluk. Maski nune’e ami sei atribui prémiu ba sira hanesan osan ho montante la hanesan inklui sertifikadu,” nia akresenta.
Notísia relevante: Ema 769 sai benefisiáriu formasaun área tolu inklui KPNI hosi IADE
Kompetisaun negósiu inovativu ne’e fó prioridade ba joven kreativa no vizaun klaru atu sai emprezáriu espesialmente iha setór turizmu. Oportunidade loke ba juventude hosi munisípiu hotu, maibé selesaun ikus hetan na’in-10, hosi totál partisipante 239.
Iha biban hanesan, Xefe Gabinete Ministru Koordenadór Asuntu Ekonómiku (MKAE), Sebastião Simões, hateten, kompetisaun planu negósiu inovativu ne’e ho intensaun atu promove produtu no servisu inovativu ho kualiade hodi promove kultura emprezariál iha Timor-Leste atubele kontribui ba dezenvolvimentu ekonomia, nune’e emprezariu sira bele koñese di’ak liután no buka ideia negósiu inovativu no bele halo planu negósiu di’ak no sustentável hodi bele identifika no define loloos saida mak sai prioridade ba implementasaun iha tempu badak.
“Kompetisaun ne’e fó oportunidade ba emprezáriu sira, espesifíkamente ba juventude hanesan emprezáriu feto no mane hodi prepara-an, nune’e bele introdús no prodús produtu ne’ebé ita konsidera foun ka inovativu ne’ebé sira iha no ikus mai iha esperansa boot sira bele kuda kultura emprezariál ne’ebé adekuadu no sustentável,” reprezentante MKAE ne’e tenik.
Nune’e mós, partisipasipante kompetisaun, Jafet Potenzo Lopes, konsidera planu negósiu inovativu turizmu ba konservasaun balada fuik nu’udar esperiénsia foun ida.
“Ami nunka hatene oinsá atu kria planu negósiu ne’ebé inovativu liuhosi programa IADE nian ne’ebé mak oferese hosi fevereiru 2022 to’o agora. Ami liuhosi etapa barak, apreende oinsá kria no dezeñu modelu atu atinje objetivu planu negósiu,” nia dehan.
Tuir nia, dezeña modelu ba planu negósiu ne’e di’ak tanba molok kria empreza kiik ba an rasik presiza hatene mós sura osan, asesu ba merkadu no kontinua ba produtu sira ne’ebé iha.
“Ha’u-nia planu negósiu maka turizmu konservasaun balada fuik liga ba turizmu natureza, ne’ebé ha’u-nia esperiénsia kona-ba buat furak sira iha rai-laran no tasi-laran. Hosi formasaun sira hosi IADE ne’e ha’u aprende katak ha’u bele hatene oitoan ha’u iha merkadu no rai ha’u-nia osan oitoan hodi sai emprezáriu di’ak iha futuru,” nia otimista.
Orsamentu ba manan-na’in sira hamutuk $22.500, prémiu ba vensedór dahuluk $6.000, vensedór daruak $5.000, no datoluk $4.000, no na’in-hitu seluk kada ema sei simu $1.700 resin.
Orsamentru ba programa negósiu inovativu 2022 hosi Orsamentu Jerál Estadu $40.000, hosi parseiru sira hanesan Empreza Santos $25.000, no Timor Telecom $20.000.
Atividade ne’e hala’o durante loron-tolu, hosi loron 26 to 28 outubru, ne’ebé iha loron dahuluk no daruak, kandidatu sira halo aprezentasaun planu negósiu no iha loron ikus maka fó sai manán na’in sira.
Jornalista : Antónia Gusmão
Editora : Julia Chatarina
