MAE apoia jeradór elétriku ba sede suku 10 iha Viqueque
DILI, 26 outubru 2022 (TATOLI)–Ministériu Administrasaun Estatál (MAE) liuhosi Diresaun Nasionál Suku apoia jeradór elétriku ba sede suku 10 iha munisípiu Viqueque ne’ebé seidauk asesu eletrisidade.
Diretór Diresaun Servisu Apoiu Sosiadade Sivil iha munisípiu Viqueque, Cosme Sarmento, informa, fasilidade ne’e hodi fasilita servisu administrasaun suku.
“Antes ne’e MAE apoia uluk komputadór maibé suku sira ne’ebé laiha eletrisidade la uza ekipamentu. Tanba ne’e mak Governu apoia tan jeradór ba suku 10 iha Viqueque,” Diretór hateten ba Agência Tatoli, via telefónika, kuarta ne’e.
Notísia relevante: MAE ezekuta OJE 2022 atinje ona 85% iha trimestre datoluk
Parte diresaun entrega ona jeradór ba suku lima iha postu administrativu Ossu, suku haat iha postu Lacluta no suku ida iha Viqueque Vila.
“Jeradór fahe hotu ona iha loron segunda (24/10) ba suku sira iha postu tolu ne’ebé la asesu eletrisidade. MAE koordena ho diresaun molok atu distribui,” nia akresenta.
Diretór ne’e iha esperansa jeradór ne’e bele ajuda autoridade suku sira hodi halo atendimentu di’ak liután ba komunidade.
“Apoia jeradór ne’e importante tebes tanba bele ajuda autoridade sira iha suku hodi halo atendimentu ba komunidade. Tanba sira iha ona komputadór no printer maibé iha suku 10 la uza tanba eletrisidade iha sede suku laiha,” nia hato’o.
Jornalista : Vitorino Lopes da Costa
Editora : Julia Chatarina
