DILI, 27 outubru 2022 (TATOLI)–Estudante timor-oan neen ne’ebé hetan bolsa estudu hosi Governu xinez deziste la filafali kontinua estudu iha Xina.
Diretór Ezekutivu Fundu Dezenvolvimentu Kapitál Umanu (FDCH, sigla portugés), Cristóvão dos Reis, hateten estudante neen ne’ebé la prontu filafali kontinua estudu ne’e tama iha lista estudante 59 ne’ebé atu filafali kontinua estudu iha Xina.
“Sira balun hetan ona apoiu bolsa estudu hosi nasaun seluk, balun kontinua eskola de’it iha Universidade Nasionál Timor-Lorosa’e (UNTL) no seluk fali hetan ona serbisu. Tanba ne’e sira kansela filafali bá Xina,” Diretór Ezekutivu FDCH informa hafoin ramata serimónia despedida estudante 38 kontinua estudu iha Xina, iha otél Novo Turismo, Bidau Lecidere, kinta ne’e.
Notísia relevante: MESSK sei prepara orsamentu ba estudante Xina 126
Bazeia ba dadus ikus hosi Ministériu Ensinu Superiór Siénsia no Kultura (MESSK), iha estudante 66 mak hetan diretu atu filafali kontinua estudu iha nasaun Xina tanba estudante hirak ne’e bainhira iha kondisaun COVID-19 kontinua mantein iha Xina to’o Governu Timor-Leste liuhosi kooperasaun ho Governu Nova Zelándia repatria sira fila hikas mai Timór.
Hafoin halo verifikasaun didi’ak, hetan estudante 59 tanba neen deziste, enkuantu estudante ida naran dupla, ho nune’e Governu Timor-Leste kontinua tau osan hodi filafali ba Xina.
“Na’in-21 desloka uluk ona no iha tempu besik ita haruka tan na’in-38,” nia tenik.
Nune’e, hosi fundu ne’ebé Governu Timor-Leste prepara ona atu apoiu bolseiru na’in-59 ho montante $270.600, ne’ebé kada estudante sei hetan fundu $4.100, sei fahe ba osan sosa billete $3.600 no kuarentena $400.
Jornalista : Tomé Amado
Editora : Julia Chatarina
