MF sosializa prosesu implementasaun lei tributária ba abitante Viqueque
DILI, 27 outubru 2022 (TATOLI)—Ministériu Finansa liuhosi Diresaun Tributária Nasionál (DTN), kinta ne’e, sosializa lei tributária no administrasaun impostu ba abintante munisípiu Viqueque.
“Atividade ne’e hodi komunidade bele hatene kona-ba obrigasaun no direitu atu selu impostu no direitu atu reklama lala’ok prosedimentu implementasaun lei tributária no administrasaun impostu iha munisípiu rasik,” Reprezentante Komisáriu Autoridade Tributária, Julio de Araujo da Silva, informa liuhosi nota ne’ebé ba Agência Tatoli asesu, kinta ne’e.
Implementasaun lei tributária hosi autoridade tributária ho baze legál Konstituisaun RDTL artigu 55 no artigu 144, tuir regulamentu UNTAET númeru 18/2000 kona-ba sistema reseita públika Timor-Leste no lei tributária ne’e rasik númeru 8/2008 no desizaun administrativa públika, artigu 66 númeru 2000/18, nune’e mai ho baze legál estrutura autoridade tributária, dekretu-lei númeru 31/2019, 18 dezembru no diploma ministeriál númeru 52/2021, 21 jullu kona-ba funsionamentu autoridade tributária nian.
Notísia relevante: Governu altera Lei Tributária no kria fundu kombatente libertasaun nasionál
Iha parte seluk, Reprezentante Administrasaun munisípiu Viqueque no atuál Diretór Jestaun merkadu munisípiu Viqueque, Estevão de Carvalho, agradese ba ekipa autoridade tributária sira ne’ebé mai hodi realiza atividade ida-ne’e, nune’e bele hatene kle’an ba lei tributária.
“Ami agradese ba ekipa autoridade tributária bele fó sosializasaun ba komumidade, empreza no loja sira atu hatene kle’an no entende didi’ak kontíudu sosializasaun lei tributária kona-ba prosedimentu jerál implementasaun no administrasaun impostu iha munisípiu Viqueque hodi Komunidade kontribui iha prosesu dezenvolvimentu Timor-Leste relasiona kontribui iha prosesu selu taxa nian. Iha oportunidade ne’e ekipa autoridade tributária sei aprezenta kona-ba tékniku administrasaun, oinsá selu impostu no prienxe formuláriu sira no mós oinsá kanaliza osan ka prosedura selu taxa tuir formatu legál,” nia hato’o.
Sosializasaun ne’e realiza durante loron ida no hetan partisipasaun hosi komunidade, empreza, no funsionáriu servisu liña ministeriál sira iha munisípiu Viqueque.
Jornalista : Vitorino Lopes da Costa
Editora : Julia Chatarina
