Governu altera Lei Tributária no kria fundu kombatente libertasaun nasionál
DILI, 26 abril 2022 (TATOLI)—Governu liuhosi reuniaun Konsellu Ministru (KM) extraordinária aprova alterasaun daruak ba Lei númeru 8/2008, loron 30 juñu, kona-ba Lei Tributáriu no kriasaun fundu kombatente libertasaun nasionál.
“Altera taxa hosi impostu seletivu ba konsumu nian, kona-ba produtu oin-oin ne’ebé ladi’ak ba saúde, ne’ebé sei ajuda atu kompensa aumentu despeza no eventualmente hamenus valór transferénsia Fundu Mina-rai nian,” Ministru Prezidénsia Konsellu ministru, Fidelis Manuel Leite Magalhães, relata hafoin reuniaun ezekutivu iha auditorium Ministériu Finansa, Aitarak-laran, tersa ne’e.
Notísia relevante: Fundu kontributivu veteranu millaun $20-resin iha konta fundu veteranu
Enkuantu, kriasaun fundu kombatente libertasaun nasionál hodi garante finansiamentu adekuadu ba programa apoiu ba kombatente libertasaun nasionál.
“Ho proposta lei ida-ne’e mak sei prosede mós kriasaun Fundu Kombatente Libertasaun Nasionál, ho valór millaun $1.000 (biliaun $1) hodi garante finansiamentu adekuadu ba programa apoiu ba Kombatente Libertasaun Nasionál, maka hanesan iha área apoiu sosiál, edukasaun, saúde, empregu, asesu ba kréditu no atividade sira ne’ebé hamosu rendimentu”, nia tenik.
To’o janeiru 2022, fundu kontributivu veteranu akumula ona millaun $20 resin iha konta fundu veteranu nian ho benefisiáriu hamutuk 27.828.
Investimentu fundu hahú hosi janeiru 2020 to’o agora, ne’ebé kada fulan Ministériu Asuntu Kombatente Libertasaun Nasionál hanesan ministériu implementadór programa, ko’a osan $30 hosi kada veteranu, ho totál veteranu ne’ebé sai benefisiáriu hamutuk 27.000 resin, hodi depozita ba Banku Nasionál Komérsiu Timor-Leste (BNCTL, sigla portugés).
Polítika Governu mak atu garante sustentabilidade ba veteranu sira, ne’ebé atu transforma ba investimentu ida hodi husik ba veteranu sira-nia oan iha futuru.
Antes implementa polítika ne’e, Sekretariadu Estadu Asuntu Kombatente no Libertasaun Nasionál (SEAKLN) halo ona sensibilizasaun ba veteranu benefisiáriu iha munisípiu hotu hodi hetan aseitasaun.
Nune’e mós, liuhosi kongresu konsellu nasionál kombatente libertasaun nasionál dahuluk aprova deliberasaun númeru 01, iha loron 21 dezembru 2019, hodi fó kbiit ba SEAKLN hodi hahú implementa polítika kriasaun fundu investimentu ba veteranu.
Jornalista : Antónia Gusmão
Editora : Julia Chatarina
