Ministru Longuinhos dezeju susesu ba estudante 59 kontinua estudu iha Xina
DILI, 27 outubru 2022 (TATOLI)–Ministru Ensinu Superior Siénsia no Kultura (MESSK), Longuinhos dos Santos, dezeju susesu ba estudante timor-oan na’in-59 ne’ebé sei filafali kontinua estudu iha Xina.
“Ami dezeju bainhira imi filafali mai Timor-Leste tenke lori rezultadu di’ak ba ita-nia rai doben Timór. Tanba ne’e ha’u hakarak hato’o parabéns ba imi na’in-59 ne’e tanba bele hetan filafali oportunidade hodi kontinua estudu iha Xina. Estuda didi’ak ba no susesu ba imi hotu,” Ministru Longuinhos hato’o mensajen liuhosi Diretór Ezekutivu Fundu Dezenvolvimentu Kapitál Umanu (FDCH, sigla portugés), Cristóvão dos Reis, ba estudante sira iha serimónia despedida ne’ebé hala’o iha otél Novo Turismu, Bidau Lecidere, kinta ne’e.
Nune’e, Ministru husu ba estudante 59 ne’ebé hetan ona apoiu fundu viajen no kuarentena hosi Governu atubele utiliza osan sira ho responsabilidade hodi hala’o viajen filafali ba Xina.
“Estudante sira labele baruk atu esforsu hodi fó hanoin nafatin ba Governu katak edukasaun importante tebes ba imi-nia moris. Mehi boot hakarak filafali kontinua estudu iha nasaun Xina ne’e ohin loron bele konkretiza duni, maski antes ne’e hasoru dezafiu boot tanba COVID-19 ne’ebé konsege impede prosesu ensinu aprendizajen estudante durante besik tinan-rua nia laran,” nia akresenta.
Notísia relevante: Bolseiru timor-oan neen deziste fila kontinua estuda iha Xina
Lori VIII Governu Konstitusionál nia naran, espesífiku MESSK, Ministru agradese ba Gabinete Primeiru-Ministru, Gabinete Ministériu Negósiu Estranjeiru no Kooperasaun (MNEK), inklui Embaixada Xina iha Timor-Leste, tanba hotu-hotu preokupa destinu estudante sira hodi tuur hamutuk lori estudante sira filafali bá Xina.
Iha biban hanesan, Esmeraldito Ferreira, hanesan reprezentante estudante na’in-59, konfesa katak hanesan jerasaun foun no futuru ba rai doben Timor-Leste, atu kontinua luta hodi sai jerasaun foun ne’ebé iha kualidade no kapasidade.
“Ami nu’udar estudante sei esforsu-an maka’as atu estuda tuir ami ida-idak ninia área, nune’e bainhira ami finaliza estudu iha asaun Xina, ami bele kontribui matenek hodi dezenvolve rai doben Timor-Leste,” nia otimista.
Embaixadór husu estudante 59 apreende dezenvolvimentu iha Xina
Embaixadór Repúblika Popular Xina iha Timor-Leste, Xiao Jiangua, husu ba estudante bolseiru timor-oan na’in-59 ne’ebé tempu besik sei filafali kontinua estudu, atu buka haka’as-an hodi apreende liután dezenvolvimentu.
“Ha’u husu imi-nia esforsu atu estuda maka’as tanba Xina mós iha ona planu ba dezenvolvimentu. Ita-boot sira durante iha ne’ebá tenke buka apreende kona-ba dezenvolvimentu, atu nune’e bainhira filafali mai bele aplika fali iha Timór,” nia fó hanoin.
Diplomata ne’e konsidera, estudante sira konsege filafali kontinua estudu ne’e nu’udar oportunidade ida.
“Husu ba ita-boot sira atu estuda maka’as hodi bele halo kompetisaun nune’e imi bele hetan buat ruma durante estuda iha Xina,” nia tenik.
Tuir Embaixadór, kontinuasaun programa apoiu bolsa estudu ba estudante timor-oan na’in-59 ne’e realiza filafali bainhira Timor-Leste hetan vizita ofisiál hosi Ministru Negósiu Estranjeiru Xina mai Timor-Leste no líder timor-oan sira hato’o proposta kona-ba asuntu bolsa estudu ne’ebé sai preokupasaun Xina hodi haree hikas fali kestaun ne’e.
“Ha’u rasik preokupa bainhira ha’u filafali bá Xina, ha’u hato’o mós proposta ba Governu Timor-Leste, ne’ebé husu Xina nia apoiu atu simu fali estudante timor-oan ne’ebé fila iha situasaun COVID-19. Ikus mai proposta Timor-Leste hetan aseitasaun no ikus mai bele kontinua loke oportunidade ba estudante timor-oan sira kontinua estuda iha Xina,” nia dehan.
Biban ne’e, Diplomata ne’e la haluha hato’o agradesimentu ba Governu Timor Leste, liu-liu Ministériu Negósiu Estranjeiru no Kooperasaun (MNEK) no Ministériu Ensinu Superior Siénsia no Kultura (MESSK) tanba ho ministériu rua ne’e ninia esforsu maka ohin bele realiza hikas serimónia despedida ba estudante sira atu filafali bá Xina.
Jornalista : Tomé Amado
Editora : Julia Chatarina
