DILI, 27 outubru 2022 (TATOLI)–Primeiru-Ministru (PM), Taur Matan Ruak, preokupa tanba joven timor-oan barak mak hakarak buka serbisu de’it iha eskritóriu no lakohi serbisu halo to’os no natar.
“Serbisu iha rai-laran iha, sé mak dehan laiha, to’os ho natar iha, problema ida ita iha agora mak ema hotu lakohi halo to’os no natar, mai hotu iha sidade. Haree fali ba konsume fo’os tonelada 130.000 enkuantu produsaun rai-laran 70.000 de’it, entaun la to’o, nune’e ita-nia osan sai para lori fo’os mai, maibé ita nia-rain luan barak abandona de’it,” PR Taur hateten hafoin ramata reuniaun semanál ho Xefe Estadu, iha Palásiu Prezidensiál, Bairru-Pité, kinta ne’e.
Notísia relevante: MNEK rejista timor-oan 5.000 tama Portugal tinan ne’e
Xefe Governu hato’o preokupasaun ne’e ligadu ho timor-oan barak ne’ebé daudaun sai bá buka serbisu iha rai-li’ur no balun terus hela iha ema-nia rain.
“Hanoin de’it serbisu iha kantor (eskritóriu) konserteza katak labele, maibé se ita haree dehan buat hotu ne’ebé bele kontribui ajuda ita hetan rendimentu hanesan ita-nia inan-aman sira halo mak kuda modo, tau-matan ba kafé no natar sira, ha’u hanoin bele. Ita-nia joven sira ba iha ne’ebá (Inglatera) barak mak esperiénsia laiha, depois ko’alia malae nia lian mós araska. Ema hotu tenke iha liberdade atu bá fatin hotu, la impede maibé tenke kumpre regra hotu,” nia tenik.
Aleinde ne’e, Taur mós kestiona kona-ba timor-oan sira toba iha estrada-ninin no jardín sira iha Portugal.
“Dezde malae nia tempu to’o mai Indonézia nia tempu ita la halo ida-ne’e, to’o fali mai ukun-an ita halo fali ida-ne’e. Tanba ne’e husu atu hotu-hotu pasiénsia oitoan, trata tuir dalan, hodi nune’e labele prejudika sira-nia an. Tanba situasaun sira ne’e tau tiha ita iha lista mean, hanesan timor-oan sira tuda malu no baku malu iha Inglatera ne’ebá ne’e ema halo vídeo tau iha rede sosiál, sira mak halo maibé ita Timór tomak naran foer,” nia kestiona.
Jornalista : Antónia Gusmão
Editora : Julia Chatarina
