COVALIMA, 27 outubru 2022 (TATOLI)—Diretór Programa Nasionál Dezenvolvimentu Suku (PNDS) Covalima, Filipe Cardoso, hateten PNDS implementa ona projetu bee-moos ba komunidade Covalima hamutuk 79 liuhosi programa regular siklu dahuluk to’o dahaat.
“PNDS Covalima implementa projetu bee-moos hamutuk 79 ne’ebé ita haree ba kada siklu hahú hosi siklu dahuluk to’o siklu dahaat implementa iha munisípiu Covalima,” Filipe Cardoso aprezenta dadus ne’e ba autoridade covalima, iha salaun Administrasaun Munisípiu Covalima (AMC), Sukaer Laran, kinta ne’e.
Projetu bee-moos ne’ebe PNDS implementa tuir siklu hahu hosi siklu dahuluk to’o dahaat ne’e, projetu bee-moos hamutuk 79 ne’e inklui aumenta ho projetu adisionál ne’ebé implementa iha postu administrativu hitu (7) iha Covalima.
Tipu projetu ne’ebé PNDS implementa ne’e mak hanesan projetu kanu distribuisaun bee-moos rua (2), projetu bee posu neen (6), projetu bee-moos sistema bomba 25, projetu bee-moos sistema gravitasaun 41, projetu bee-moos tanke rezervatóriu haat (4) no projetu bee-moos tanke kaptasaun ida (1).
Durante PNDS implementa projetu bee-moos sira-nee, komunidade balun kontinua sei uza no balun volume bee menus no balun avaria entaun komunidade labele uza.
Projetu bee-moos 79 ne’ebé PNDS implementa iha Covalima ne’e projetu bee-moos siklu dahuluk iha projetu hamutuk 29 no hosi númeru ne’e kominidade sei uza projetu bee-moos 22 no komunidade la utiliza ona, tanba mákina bomba avaria hamutuk projetu hitu (7) ne’ebe aumenta ho projetu adisionál.
Jornalista : Celestina Teles
Editór : Cancio Ximenes
