PR Horta apresia ho serbisu Konsul Jerál TL iha Bali

DILI, 29 outubru 2022 (TATOLI)- Prezidente Repúblika (PR), José Ramos Horta, agradese serbisu hosi Konsuladu Jerál Timor-Leste bá Bali-Indonézia ne’ebé la’o di’ak hodi reprezenta imajen Timor-Leste (TL) iha Indonézia.
“Ha’u foin primeiravez mak mai vizita, haree imi nia fatin di’ak tebes, imi kontinua serbisu di’ak nafatin ho autoridade Indonesia”, Ramos Horta, hato’o liu hosi komunikadu imprensa ne’ebé Agência Tatoli asesu, hafoin vizita dahuluk durante tranzita iha Bali, antes atu hala’o vizita Estadu ba Portugál.
Iha vizita ne’e, Xefe Estadu haree direta serbisu Konsul Jerál Timor-Leste ba Bali, Aleixo da Silva ho diplomata, Hugo Imanuel Garcia no funsionáriu na’in-22 ho feto nain haat ne’ebé durante tinan 16 ona hala’o serbisu protoklár no reprezenta imajen Timor-Leste hodi hametin lasu kooperasaun iha área oin-oin ho Governu Indonézia.
Vizita Xefe Estadu akompaña hosi Ministra Negosiu Estranjeiru no Kooperasaun (MNEK), Adalijiza Albertina Xavier Reis Magno, Embaixadór Timor-Leste ba Jakarta, Filomeno Aleixo no Assesor Relasaun Internasionál Prezidensia Repúblika, Nelson Santos no Ivo Valente.
Hafoin enkontru, Xefe Estadu mós rona aprezentasaun husi Konsúl Jerál iha Bali, Aleixo da Silva no agradese vizita Xefe Estadu iha Konsuladu.
Edifísiu Konsuladu Jerál Timor-Leste iha Bali ho andar rua no sala serbisu fatin neen no fatin enkontru ne’e Governu Timor-Leste sosa iha tinan 2013 liuba.
Edifísiu ne’e hetan vizita ona hosi Líder Nasionál , Kay Rala Xanana Gusmão iha loron 20 agostu 2022, no foin dahuluk hetan vizita tan hosi PR Ramos Horta, Prezidente PN, Aniceto Guterres no Ministra MNEK, Adaljiza Magno.
Durante iha Bali, Ramos Horta mós hasoru malu ho Prezidente Parlamentu Nasionál , Aniceto Loinguinhos Guterres, ne’ebé foin hala’o vizita serbisu iha Portugál.
Prezidente Repúblika, José Ramos Horta ho Prezidente PN, Aniceto Guterres, atualiza informasaun ba malu kona-ba vizita bá Portugál no Prezidente Aniceto informa mós ninia vizita ho delegasaun PN hodi partisipa sesaun solene XI Asembleia Parlamentár CPLP ne’ebé hala’o iha Portugál hosi loron 24 too 26 outubru 2022.
Notísi relavante:PN aprova pedidu PR Horta vizita Kamboja-Suisa-Portugál
Jornalista: Nelson de Sousa
Editór : Florencio Miranda Ximenes

