Didin UKL ida iha suku Matahoi Viqueque hahú nakfera
VIQUEQUE, 31 outubru 2022 (TATOLI)—Reprezentante Benefisiáriu Uma Kbiit Laek (UKL), Moises Soares, relata katak didin UKL ba benefisiáriu Mariana Soares, iha aldeia Maukiak, suku Matahoi, postu administrativu Uatulari, munisípiu Viqueque, hahú nakfera.
“Ami haree uma UKL ne’ebé entrega ba benefisiáriu Mariana nian agora hahú nakfera, maibé uma ne’e foin lalais maka entrega,” Moises Soares, hateten ba jornalista sira iha aldeia Maukiak, segunda ne’e.
Nia dehan, parte família relata ona kondisaun ne’e ba jestaun suku Matahoi maibé sira dehan loron finadu liu maka bele haree hodi hadi’a.
“Ita haree ba montante orsamentu konstrusaun boot, maibé ita haree ba kualidade ladún di’ak tanba uma ne’e seidauk tinan-ida maibé hahú nakfera. Benefisiáriu mós fo hatene ha’u katak iha tempu udan iha kuartu rua maka udan-been tama. Tanba ne’e maka ami hakarak hato’o ba parte relevante sira atu haree uma ida-ne’e,” nia akresenta.
Notísia relevante: MAE entrega UKL tolu ba benefisiáriu iha suku Matahoi Viqueque
Nune’e, nia husu bainhira halo konstrusaun tenke garante kualidade nune’e benefisiáriu sira simu no uza ba tempu naruk nian laran.
“Ami hakarak hato’o ba autoridade relevante sira tenke kontrola, nune’e ita harii dezenvolvimentu ida tenke ho kualidade. To’o agora benefisiáriu Mariana nian eletrisidade seidauk dada, ida-ne’e mós sai preokupasaun ida,” nia tenik.
Aleinde ne’e, sasán ne’ebé benefisiáriu simu maka hanesan kama tolu, armáriu ida, kulsaun tolu, meza ho kadeira, enkuantu sasán dapur la simu.
“Ita haree benefisiáriu seluk hanesan Benvinda no Lucas nian sasán dapur nian kompletu. Ida-ne’e mós ami hato’o ona,” nia dehan.
Konstrusaun UKL ba benefisiáriu Mariana Soares ho kustu $17.000, kompostu hosi kuartu tolu, sala ida no dapur ida.
UKL regulár tolu iha suku Matahoi hahú harii iha tinan 2021, finaliza iha juñu 2022, no halo inaugurasaun iha loron 22 juñu 2022.
Jornalista : Vitorino Lopes da Costa
Editora : Julia Chatarina
