VIQUEQUE, 31 outubru 2022 (TATOLI)—Polísia Nasionál Timor Leste (PNTL) munisípiu Viqueque liuhosi Servisu Unidade Tránzitu kontinua halo pasa revista ba movimentu transporte, relasiona ho loron finadu ne’ebé daudaun ema komesa halo ona movimentu ba munisípiu sira.“Ohin loron ha’u nafatin orienta Servisu Unidade Tránzitu munisípiu Viqueque atu halo check point ba movimentu tranporte públiku no Estadu ne’ebé halo movimentu mai munisípiu Viqueque,” Komandante PNTL munisípiu Viqueque, Supertendente, Sebastião Alves Quintão, informa ba Agência Tatoli, iha Komandu PNTL Viqueque, segunda ne’e.
Servisu Unidade Tránzitu sira kontinua halo check point ba motorizada ne’ebé halo infrasaun no viola kódigu estrada, bazeia ba dekretu-lei númeru 3/2003 no kontrola mós karreta Estadu ne’ebé halo sirkulasaun hosi Dili bá munisípiu Viqueque.
“Bainhira laiha dukumentu, ami sei halo apreensaun maibé to’o agora ami seidauk hetan karreta Governu,” nia akresenta.
Notísia relevante: PNTL no F-FDTL hala’o operasaun asegura loron matebian iha Baucau
Bainhira PNTL sira halo apreensaun ba motorizada ida, na’in tenke selu direta iha banku hafoin sira bele foti transporte.
“Kada loron ami sempre halo check point, maibé dadus motorizada maka ha’u ladún lembra tanba ami kuandu halo apreensaun, ami haruka sira ba selu direta banku, fila mai mak sira foti sira-nia motorizada,” nia tenik.
PNTL Viqueque sei koloka membru iha semitériu
Komandante PNTL munisípiu Viqueque, Supertendente, Sebastião Alves Quintão, informa katak sei koloka membru iha semitériu, nune’e bele prevene konflitu.
“Kona-ba planu operasaun ba loron finadu, ha’u koloka ona membru sira iha semitériu sira iha munisípiu Viqueque hodi asegura estabilidade, nune’e labele mosu pertubasaun ruma iha loron finandu. Ami identifika fatin sira ne’ebé iha risku ba konflitu hannesan semitériu Bikarin, nune’e membru sira sei halo kontrola durante loron boot finadu no fatin sira seluk ne’ebé ami identifika ona,” nia realsa.
Biban ne’e, nia husu komunidade, liu-liu joven munisípiu Viqueque, durante loron finadu tenke hakmatek hodi kontribui ba estabilidade.
“Iha loron finadu ne’e ha’u hakarak husu ba joven sira tenke hakmatek hodi kontribui ba estabilidade, labele hemu tua iha fatin públiku no labele hemu tua ho tuur grupu iha estrada ninin, ida-ne’e PNTL la autoriza. Iha loron finadu tenke la’o ho di’ak no labele hamosu perturbasaun ruma,” nia hameno.
Bazeia ba karta sikulár hosi PNTL munisípiu Viqueque, tuir referénsia orden operasaun númeru 053/SO-cpm-VIQQ/X/2022, nune’e orden Komandante munisípiu Viqueque ne’ebé fó sai iha loron 21 outubru, ba sikulár loron 01 to’o 03 novembru relasiona ho loron finadu, sarani katólika iha Timor-Leste laran hala’o misa iha kapela no igreja, ne’ebé hotu-hotu tau aifunan iha semitériu.
Jornalista : Vitorino Lopes da Costa
Editora : Julia Chatarina
