iklan

HEADLINE, MUNISÍPIU, VIQUEQUE

Autoridade Matahoi orienta ona badaen hadi’a didin UKL hahú nakfera

Autoridade Matahoi orienta ona badaen hadi’a didin UKL hahú nakfera

UKL ba benefisiáriu Mariana Soares, iha aldeia Maukiak. Imajen Tatoli/Vitorino Lopes da Costa

VIQUEQUE, 01 novembru 2022 (TATOLI)—Autoridade suku Matahoi orienta ona badaen responsável obra atu hadi’a didin Uma Kbiit Laek (UKL) ida iha aldeia Maukiak, suku Matahoi, postu administrativu Uatulari, munisípiu Viqueque ne’ebé hahú nakfera.

“Ohin ami bolu badaen sira mai haree UKL ida-ne’e no ami husu ba badaen sira bainhira hadi’a karik, haree hotu ho uma kakuluk sira ne’ebé udan tama ne’e maka ami entrega ba benefisiáriu Mariana Soares,” Xefe suku Matahoi, António Amaral, informa ba Agência Tatoli, hafoin halo vizita ba UKL iha aldeia Maukiak, tersa  ne’e.

Entidade ne’ebé halo vizita ba benefisiáriu, Mariana Soares, nia UKL mak hanesan ekipa hosi  Programa Nasionál Dezenvolvimentu Suku (PNDS), ekipa Jestaun Suku, Xefe aldeia inklui badaen responsável ba obra.

Notísia relevante: Didin UKL ida iha suku Matahoi Viqueque hahú nakfera

Tuir António Amaral, autoridade suku halo ona kontrola ba konstrusaun UKL iha loron 22 jullu 2022, maski Ministériu Administrasaun Estatál (MAE) mai halo inaugurasaun ona, maibé enkontru finál seidauk akontese.

“Iha buat barak maka presiza kompleta iha benefisiáriu, Mariana Soares nia Uma Kbiit Laek no orsamentu selu badaen seidauk relata ba komunidade no administradór postu Uatulari. Signifika serbisu seidauk finál, bainhira finál sei iha enkontru ida hafoin relata serbisu sira,” nia akresenta.

Autoridade suku ne’e dehan, sei halo preparasaun ida nune’e liu loron finadu mak foin konvoka enkontru kona-ba UKL tolu iha suku Matahoi ne’ebé harii iha tinan 2021 ho kustu $51.000.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!