DILI, 01 novembru 2022 (TATOLI)—Primeiru-Ministru (PM), Taur Matan Ruak, lori Governu no povu Timor-Leste nia naran hato’o sentidu solidariedade profunda no kondolénsia ba Governu koreanu no família vítima sira trajédia selebrasaun Halloween iha sidade Itaewon, Seoul, Koreia Súl.
Trajédia ne’e akontese iha sábadu, loron 29 outubru, ne’ebé ema 146 lakon vida no ema 150 resin kanek tanba konsentra iha dalan kloot ida iha Itaewon hodu halo ema barak dada iis ladi’ak.
“Ha’u sente triste tebes bainhira haree notísia orível, trajédia boot iha serimónia Halloween iha sidade Itaewon, Seoul, ne’ebé hamate ema atus ida resin, ema barak sofre kanek no mós hamosu situasaun pániku ba populasaun sira. Hodi povu no Governu Timor-Leste nia naran no ha’u-nia naran rasik, hakarak transmite ami-nia solidariedade no simpatia kle’an ba Governu no povu Koreia Súl no profunda sentida kondolénsia ba família vítima sira hosi trajedia,” PM Taur hateten liuhosi nota ne’ebé Agência Tatoli asesu, segunda ne’e.
Notísia relevante: Governu desloka tan traballdór 110 bá serbisu iha Koreia Súl
Xefe Ezekutivu subliña, povu Timor-Leste nia orasaun akompaña sobrevivente sira iha situasaun difísil ida-ne’e no husu korajen nafatin.
Jornalista : Antónia Gusmão
Editora : Julia Chatarina
