Diretór Finansa MEJD konsidera eskola iha osan sufisiente responde nesesidade
DILI, 03 novembru 2022 (TATOLI)–Diretór Jerál Administrasaun no Jestaun Finansa, Antoninho Pires, hateten, osan konsensoens eskolár períodu rua ne’ebé Ministériu Edukasaun Juventude no Desportu (MEJD) transfere ba eskola sira sei sufisiente atu responde ba nesesidade eskola, maibé eskola balun deklara osan laiha.
“Osan sira ne’e atu apoiu nesesidade eskola ensinu sekundáriu jerál no eskola ensinu sekundáriu tékniku vokasionál sira, Ministériu Edukasaun transfere antes ona ba kada eskola sira tuir períodu ne’ebé iha. Ha’u hanoin Diretór eskola ne’ebé dehan osan laiha ne’e ita tenke buka hatene no halo identifikasaun tanba ninia deklarasaun ne’e la loos,” Diretór informa ba Agência Tatoli, iha ninia knaar fatin, MEJD, Vila-Verde, kinta ne’e.
Notísia relevante: Eskola ESJ 05 maiu seidauk hetan subsídiu eskolár
MEJD rasik iha ninia polítika rasik atu apoiu eskola sira liuhosi osan konsensoens eskolár períodu rua atu responde ba nesesidade sira iha eskola ida-idak.
“Se osan sira laiha duni parese mosu ona fallansu ruma iha jestaun eskola, iha ne’ebá mós akontese ona mudansa lideransa,” nia akresenta.
Tuir Diretór, bele mós akontese iha abuzu podér ruma tanba líder anteriór la kontente ho mudansa sira, nune’e dalan ida maka trava osan atu líder foun sira labele utiliza.
“Se ida-ne’e akontese duni presiza halo identifikasaun. Ita halo hotu ona transferénsia osan eskolár períodu rua ba eskola sira no agora e’e hela de’it osan períodu ikus maka ita seidauk transfere tanba osan períodu rua sei sufisiente hela atu responde nesesidade ne’ebé presiza. Agora sé diretór eskola sira kestiona katak sira debe kompañia balun hodi apoiu halo foto kopia matéria ezame lokál sira tanba de’it laiha ona osan konsensoens eskolár, bele konsidera sira la hatene jere osan ne’e ho didi’ak,” nia dehan.
Tuir padraun ne’ebé iha, osan konsensoens eskolár ne’e iha ninia definisaun la hanesan ba estudante sira hosi nível ensinu pre-eskolár no ensinu báziku, ne’ebé kada estudante sa’e ona ba $2, maibé ba estudante nível ensinu sekundáriu no tékniku vokasionál seidauk muda, sira sei kona nafatin padraun anteriór ne’ebé kada estudante $1.
Iha sorin seluk, Diretór Eskola Ensinu Sekundáriu Jerál (ESJ) 05 maiu Becora, Adelino Nicolau Ornai, konfesa katak sira nu’udar líder foun iha eskola ne’ebé laiha osan ida maka atu uza hodi aselera prosesu ruma iha eskola tanba líder sira antes ne’e la husik saldo ruma ba sira.
“Ami husu ona apoiu ba kompañia balun atu tulun relasiona ho matéria ruma ne’ebé presiza atu kopia. Tanba ne’e, iha ezame lokál liu ba kompañia fó ona apoiu tomak hodi hela kopia ba matéria ezame sira depois kuandu eskola hetan transferénsia osan iha terseiru períodu maka bele devolve filafali,” nia tenik.
Jornalista : Tomé Amado
Editora : Julia Chatarina
