DILI, 06 setembru 2022 (TATOLI)–Eskola Ensinu Sekundáriu Jerál (ESJ) 05 maiu Becora, daudaun ne’e enfrenta hela problema tanba Ministériu Edukasaun Juventude no Desportu (MEJD) seidauk transfere osan konsensaun eskolár atubele utiliza halo preparasaun matéria ezame lokál ne’ebé sei hala’o iha fulan-outubru nia-laran.
“Hosi rekizitu ne’ebé iha hateten, preparasaun ba ezame lokál ne’e ninia matéria sira prepara hosi eskola. Agora matéria sira prepara hotu ona maibé difikuldade ida maka ita laiha osan atu halo kopia,” Diretór Eskola ESJ 05 maiu Becora, Adelino Nicolau Ornai, hateten ba Agência Tatoli, iha ninia knaar fatin, kinta ne’e.
Notísia relevante: Eskola ESJ 05 maiu menus espasu ba estudante finalista partisipa ezame nasionál
Nia dehan, tanba eskola laiha osan atu halo kopia matéria ezame hodi fornese ba estudante 680, maka parte eskola halo ona kooperasaun ho kompañia balun atu husu apoiu kopia, nune’e bainhira eskola hetan ona subsídiu maka sei devolve filafali.
“Ami ko’alia no hasoru ona na’in ba kompañia balun no sira mós konkorda, ne’ebé matéria inklui nesesidade sira seluk ne’ebé ami presiza kompañia prontu apoiu atubele fasilita nesesidade estudante no eskola nian,” nia tenik.
Tuir nia, Ida-ne’e nu’udar alternativu ida atu fasilita lalais prosesu ezame lokál ba estudante sira. Tanba nu’udar líder ne’ebé foin asume papél iha eskola ne’e, seidauk barani atu husu kontribuisaun inan no aman estudante sira tanba lakohi foti risku iha futuru.
Estudante 680 ne’ebé atu partisipa iha ezame lokál kompostu hosi estudante désimu segundu ano no matéria ezame lokál ne’ebé eskola sei prepara iha neen.
Jornalista : Tomé Amado
Editora : Julia Chatarina
