DILI, 03 novembru 2022 ((TATOLI)—Sekretária Estadu Igualdade no Inkluzaun (SEII), Maria dó Rosario Fátima Correia, hateten evidénsia hatudu katak iha Timor-Leste ne’e bainhira feto ida okupa kargu, nia lideransa ne’e sei kontribui ba sosiedade ida-ne’ebé moderna no inkluziva liu.
“Ami sente orgullu tanba agora feto timoroan hamutuk 40% mak sai hanesan deputada, 15% hanesan ezekutivu, 25% ho papél responsável iha funsaun publika no 15% nu’udar lider lokál sira,” Sekretária Estadu Igualdade no Inkluzaun ne’e hateten iha selebrasaun loron nasionál feto ba dala-46 ho tema “Feto Prontu atu Lidera” ne’ebé hala’o iha Sentru Konvensaun Dili (CCD, sigla portugés), kinta ne’e.
Governante ne’e hatutan, feto sira prontu atu lidera tanba iha evidénsia katak feto hamutuk ho mane sira kontribui ba luta libertasaun pátria no dezenvolvimentu nasionál.
Tanba ne’e, nia apela ba parte interresada hotu-hotu atu fó oportunidade ba feto, ema ho defisiénsia, grupu vulneravél no Lesbians Gays Bisexuals Transsexuals no Intersexual (LGBTI) atu kontribui ba prosesu dezenvolvimentu Nasionál ne’ebé inkluzivu.
Tanba, tuir nia, feto sira iha papél importante iha área balun tanba sira hatudu espíritu solidariedade no firme iha situasaun barak, no sira aten-brani atu hato’o keixa bainhira sira sai vítima ba violénsia.
Notísia Relevante: PM Taur: “Diskriminasaun hasoru feto ne’e inimigu Estadu nian”
Jornalista : Osória Marques
Editór : Cancio Ximenes
