iklan

NASIONÁL, POLÍTIKA

PM Taur: “Diskriminasaun hasoru feto ne’e inimigu Estadu nian”

PM Taur: “Diskriminasaun hasoru feto ne’e inimigu Estadu nian”

Primeiru-Ministru, Taur Matan Ruak. Imajen Tatoli/Egas Cristóvão.

DILI, 03 novembru 2022 (TATOLI)—Xefe Governu liuhosi Vise Primeiru-Ministru no Ministra Solidaridade Sosiál no Inkluzaaun (MSSI), Armanda Berta dos Santos, apela ba entidade hotu iha Timor laran atu hapara ona hahalok desvalóriza papél no ezisténsia feto ni’an, tanba laiha feto entaun mane mós laiha no diskriminasaun hasoru feto ne’e inimigu Estadu nian.

Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos. Imajen Tatoli/Francisco Sony

“Ho selebrasaun Loron Nasionál Feto nian, ha’u husu ba entidade sira hotu hapara ona hahalok desvalóriza papél no ezisténsia feto ni’an, tanba laiha feto mane mós laiha. Tanba ne’e, diskriminasaun hasoru feto ne’e inimigu Estadu nian, hodi bele fó oportunidade hanesan ba asesu iha justisa, kampu servisu, asesu ba negósia no mós asesu ba pozisaun polítika iha ita-nia rai,” Armanda Berta dos Santos hateten liahirak ne’e bainhira reprezenta Primeiru-Ministru, Taur Matan Ruak, hato’o diskursu iha selebrasaun Loron Nasionál Feto ba dala-46 ho tema “Feto prontu lidera” ne’ebé halo iha Sentru Konvensaun Dili (CCD, sigla portugués), Dili, kinta ne’e.

Iha biban ne’e, nia husu mós ba Partidu Polítiku sira atu bele konsidera feto tanbá iha tinan 2023 Timor-Leste sei hosoru eleisaun parlamenáar, tanba ida-ne’e momentu ne’ebé importante tebes ba povu Timor-Leste atu julga Partidu Polítiku sira hodi bele fó konfiansa liuhosi votu ne’ebé sei determina distinu nasaun nian.

“Tanba ne’e, ha’u fó hanoin ba líder partidu sira, la’ós hanorin maibé fó hanoin keta haluha atu bele konsidera persentajen feto iha membru deputadu no mós iha formasaun Governu, karik 30% no mós bele liuhosi persentajen ida-ne’e. Tanba, feto mós bele okupa kargu polítiku sira-ne’ebé feto bele servi ho domin no fuan. Mai ita hotu selebra Loron Nasionál Feto ba dala-46, ha’u-nia deseju, ita hotu nia hamutuk hodi Timor-Leste ba prosperu,” nia apela.

Aleinde ne’e, Xefe Governu hato’o parabéns ba loron Nasional feto Timor-Leste, espesiálmente ba feto timoroan sira hotu ne’ebé namkari iha Timor laran tomak, tanba selebrasaun loron nasionál feto nu’udar meiu ida atu bele valóriza feto sira-nia papel iha prosesu luta ba ukun rasik an no mós papel feto iha faze dezenvolvimentu.

“Tanba tema ne’ebé dehan ‘Feto Prontu Lidera’ ne’e nia sintidu saida, feto la’ós agora de’it maibé iha tempu susar nia laran, feto sempre hamriik hamutuk ho ita-nia mane maluk sira hodi bele luta ba libertasaun ita-nia país hosi invazaun durante tinan 24. Iha luta nia laran, feto sempre hatudu nia patriotizmu mezmu dala ruma hetan torturasaun no abuzu seksuál, maibé feto sempre prontu,” nia dehan.

Iha tempu ukun an nia laran ne’e, feto sira mós kontribui nafatin iha prosesu dezenvolvimentu nasionál iha Timor-Leste, tanba papel feto sira atu bele liberta povu hosi mukit maibé dala ruma mós sei hetan estigmasaun negátivu hosi sosiedade no ema barak sei minimiza feto sira-nia kapasidade hodi haluha katak feto no mane nia hamutuk mak bele lori Timor-Leste ba iha libertasaun nasionál.

Timor-Leste, nia dehan, ratifika ona konvensaun internasionál sira ba direitu umanu no garante feto no mane nia direitu ne’ebé hanesan atu bele goza ekonomia, sosiál, kultura no mós polítiku.

“Iha konvensaun sira ne’e fó biban ba nasaun atu bele promove feto no mane nia direitu ne’ebé hanesan sita ona iha konvensaun CEDAW, Konvensaun Direitu ba Labaraik (CRC) no resolusaun ONU 1.325 feto, pás no seguransa. Governu Timor-Leste mós konsidera direitu fundamentu sira iha ita-nia país ida-ne’e no lei oan sira hodi bele hamosu Polítika públiku ba proteje no promove direitu feto nian. Tanba, feto sei iha limitasaun ne’ebé kontinua mosu hahalok balun kontra direitu feto sira-nian, hanesan sei iha diskriminasaun kontra feto no valorizasaun sei minimu ba prinsipiu igualdade direitu no respeita ba feto nia dignidade,” nia hateten.

Tuir nia, feto mós nu’udár parseiru estratéjiku ba prosesu desenvolvimentu tomak, tantu hosi uma laran nomós iha vida ekonomia.

“Feto la’os atu servi de’it maibé feto mós iha nia vida rasik hodi bele kontribui ba prosesu tomak Estadu nian. Tanba ne’e, tempu to’o ona dezenvolvimentu inkluzivu mak dalan ne’ebé adekuadu hodi bele envolve sidadaun hotu nia kbiit ba moris di’ak povu nian. Ita presiza enkuadramentu legál balun tan hodi bele fó protesaun feto nia direitu . Tanba, ita presiza mak Instituisaun Estadu nian, setór privadu fó opurtunidade ba feto sira-ne’ebé hanesan, labele husik feto sira iha kotuk,” nia dehan.

Notísia Relevante: Komemora loron nasionál feto, Dom Vírgilio Kardeál kongratula feto Timor-Leste

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!