iklan

NASIONÁL, POLÍTIKA

Komemora loron nasionál feto, Dom Vírgilio Kardeál kongratula feto Timor-Leste

Komemora loron nasionál feto, Dom Vírgilio Kardeál kongratula feto Timor-Leste

Sua Eminénsia Dom Virgílio Kardeál do Carmo da Silva, SDB. Imajen Tatoli/Francisco Sony.

DILI, 03 novembru 2022 (TATOLI)—Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, kongratula feto sira iha Timor-Leste laran tomak, ne’ebé iha loron 03 novembru 2022 komemora Loron Nasionál Feto ba dala-46.

“Liga ho selebrasaun loron nasionál feto ida-ne’e, Dom Vírgilio Kardeál kongratula feto sira-ne’ebé ohin selebra sira-nia aniversáriu ba dala-46,” Pe. Paulus Maia hateten mensajen hosi Dom Vírgilio Kardeál do Varmo da Silva, SDB, ne’e ba jornalista sira, hafoin ramata prezide misa agardesiementu ba Loron Nasionál Feto ba dala-46 iha igreja Santo António Motael, Dili, kinta ne’e.

Maske nune’e, nia esplika, iha nia konteúdu hosi nia reflesaun liga ho evangellu ohin katak razoável ka lae ema ida husik hela bibi 19 hodi ba buka ida lakon, entaun ida-ne’e relevante tebes ho festa selebrasaun ohin nian, ne’ebé feto sira selebra tinan-46 ezisténsia loron nasionál feto nian.

“Serake ida ne’e razoável se feto sira nafatin halo sakrifisiu ba ita-nia ukun rasik an ne’e, tenke sakrifika sira-nia moris hodi buka ida-ne’ebé importante ba ita-nia nasaun. Loos duni, tuir ita ema-nia hanoin ne’e razoável maibé tuir ita-nia pensamentu ekonomika ida-ne’e la masuk akal, maibé ida la masuk akal ne’e mak importante tebes ba ita-nia moris loro-loron. Ezemplu, dezigualdade ne’ebé moris buras iha ita-nia sosiedade, moris la ho dame, violénsia doméstika ne’ebé buras daudaun, sai hanesan buat osan-mean ida-ne’ebé lakon, ne’ebé ita presiza buka hodi dezenvolve, luta no hodi hadi’a. Ida-ne’e mak mensajen importante ne’ebé ita presiza halo,” nia hateten.

Keta haluha katak ida lakon ne’e la importante, maibé ida lakon ne’e mak importante liu no karik ida-ne’e mak sei fó klosok. Liberdade no fó ema moris iha justisa no dame, liu-liu prosperidade no moris ema-nian, moris hanesan timoroan no moris hanesan sarani iha sosiedade timorense.

Maibé, felizmente agradese ba Maromak tanba ihaTtimor bele dehan feto potensiál barak iha parte hotu-hotu maibé oinsá atu esplora potensiál hirak ne’e, liu-liu poténsia ne’ebé feto sira iha.

“Entaun, presiza halo atividade barak ne’ebé envolve sira iha atividade sira-ne’e, hodi halo esplorasaun ba sira-nia poténsia ne’ebé sira iha. Dala ruma ema iha poéensia maibé tanba laiha ema ruma labele tulun ho atvidade sira, entaun poténsia sira-ne’e lakon saugate no sira gasta saugate de’it, uza ba buat sira seluk ne’ebé la kondis ho poténsia sira-ne’ebé iha,” nia dehan.

Feto potensiál sira-ne’e, sira bele uza poténsia ne’ebé sira iha hodi dezenvolve edukasaun iha Timor-Leste hanesan edukasaun iha familia, soseidade liu-liu feto sira hamutuk iha feto sira-ne’ebé iha poténsia hodi tau hamutuk atu sai forsa ida hodi dezenvolve Timor-Leste.

Tanba ne’e, timoroan labele dehan feto Timor labele no labele dehan feto sira iha kotuk, tanba feto Timor iha poténsia maibé seidauk esplora didi’ak poténsia sira-ne’ebé feto Timor-Leste sira iha.

“Hosi ne’e, hein katak esperiénsia moris ita-nia antes to’o tinan-46, bele sai nafatin lisaun ba ita. Tanba ita hotu simu responsabilidade ida hodi dezenvolve ita-nia rai, entaun buat hotu ne’ebé ita presiza uza ho didi’ak hodi dezenvolve ita-nia rain. Hanesan, uluk ita-nia eroiana sira, ne’ebé sira fó sira-nia moris no fó an ho sira-nia kapasidade ne’ebé limitada no kuiñesimentu ne’ebé natón hodi sira bele fó tomak ba rai ida-ne’e, hodi sira sakrifika sira-nia moris. Nune’e, ohin ita hotu-hotu bele hatene no asesu buat barak, entaun ita uza buat hirak ne’e hodi dezenvolve poténsia pesoál, liu-liu poténsia pesoál ida-ne’e uza hodi dezenvolve rai Timor ida-ne’e,” nia apela.

Sekretária Estadu Igualdade no Inkluzaun (SEII), Maria do Rosário Fatima Correia, hateten iha loron 03 novembru ne’e hanesan Loron Nasionál Feto ne’ebé eroi sira deside uluk iha ai-laran kedas, sira estabelese organizasaun feto iha ai-laran.

Nune’e. Parlamentu Nasionál mós aprova loron ida-ne’e sai hanesan Loron Nasionál Feto no atu komemora nafatin loron ne’e oinsá atu dignfika no váloriza saudoza sira-ne’ebé durante ne’e sakrifika sira-nia an, hodi lori Timor-Leste hanesan nasaun independente.

“Hirak ne’ebé hela nafatin. Mai hamutuk ho ami atu kontinua nafatin atu luta ba iha justisa no ba igualdade jeneru no inkluzaun iha Timor-Leste. Ami agradese tanba ema partisipa mós di’ak, ohin líder nasionál hanesan Maun Boot Lere Anan Timur ne’ebé mak mai, ida ne’e urgullu tebes mai ami. Ba ita jerasaun foun sira katak ita-nia líder sira nafatin fó korajen ba ita atu bele mellora di’ak liután asuntu ne’ebé mak uluk kedas iha ai-laran liu-liu ba feto, tanba ita hetan ona liberdade oinsá atu hetan justisa mosu igualdade, tanba desigualdade dala ruma akontese nafatin. Entaun, loron ida ne’e sai importante tebes ba ita atu váloriza,” Maria do Rosário Fatima Correia, hateten ba jornalista sira, bainhira ramata karii ai-funan iha ponte kais (portu) Dili.

Entretantu, bainhira ramata misa agradesimentu ba loron nasionál feto ba dala-46 iha igreja Motael, Sekretaria Igualdade no Inklusaun, Lider Nasionál Lere Anan Timur, Deputada, Feto Potensiál, Polisia Nasionál Timor-Leste (PNTL), Madre no sarani sira, halo marsa hosi Igreja Motael ba Portu Dili hodi kari ai-funan.

Notísia Relevante: Feto tenke kompete iha eleisaun parlamentár no iha espíritu solidareiedae forte

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!