iklan

DILI

Feto tenke kompete iha eleisaun parlamentár no iha espíritu solidariedade forte

Feto tenke kompete iha eleisaun parlamentár no iha espíritu solidariedade forte

Sekretária Estadu ba Igualdade no Inkluzaun, akompaná hosi Inán feton sira tau ai-funan iha ponte kais Dili hodi komemora loron nasionál feto Timor-Leste, kinta (03/11). Imajen Tatoli/António Daciparu.

DILI, 03 novembru 2022 (TATOLI)—Eis Sekretária Estadu Igualdade no Inkluzaun (SEII), Idelta Maria Rodrigues, hateten feto Timor-Leste tenke kompete iha eleisaun parlamentár no eleisaun xefe suku iha tinan oin, maibé presiza iha espíritu kolaborativu, solidariedade no komunikasaun ne’ebé forte.

Notísia Relevante: Parlamentu Nasionál kontinua fó prioridade ba asuntu jéneru

“Feto sira presiza iha espíritu kolaborativu, esperitu solidariedade no espíritu komunikasaun, ne’ebé forte hodi nune’e bele mellora liután hodi envolve iha eleisaun parlamentár no eleisaun xefe suku nian iha tinan oin,” Idelta Maria Rodrigues hateten iha komemorasaun loron nasionál feto, iha Sentru Konvensaun Dili (CCD-sigla portugés), kinta ne’e.

Idelta hatutan, tanba evidénsia globál hatudu katak bainhira feto pozisaun lidera ba mudansa no transformasaun iha sosiedade ne’ebé progresivu no inkluzivu tanba sira kontinua luta no buka espasu metin ne’ebé sei metin ho vizaun patrirkál.

“Ita orgullu tanba daudaun ne’e, ita iha feto 40% tuur iha Parlamentu Nasionál, 15% feto tuur hanesan ezekutivu, iha Funsaun Públiku feto 25% no iha autoridade lokál iha 15%. Ho ne’e, ita hotu tau beran hamutuk hodi hakbiit feto sira kontinua kompete iha eleisaun parlamentár no xefe suku. Tanba iha Parlamentu Nasionál ita iha ona norma katak kuota ba feto iha 30%, nune’e partidu ida-ne’ebé mak feto lidera konserteja feto mak sei iha númeru um ho dois nian,” nia hateten.

Nia enkoraja feto hotu-hotu atu kandidata an ba eleisaun suku nian, la komporta atu manán maibé importante mak brani no iha espíritu hodi bele kompete no hatudu feto mós bele no prontu lidera.

“Tanba ne’e, iha momentu ida-ne’e, ita tau forsa hamutuk, la presiza kór tanba kór maihosi oioin maibé ita mai ho objetivu ida de’it mak luta ba desigualdade ne’ebé iha fatin-fatin kontinua akontese,” nia enkoraja.

Tanba, tuir nia, feto mós uluk luta ba libertasaun Nasionál tanba ne’e tempu ona atu feto mós hamriik iha oin hodi hatudu ba mane katak feto mós bele.

“Nune’e ita feto tenke hatudu espíritu kolaborativu, esperitu solidariedade no espíritu komunikasaun hodi kontinua luta, nune’e mellora liután ita-nia dezempeñu iha sosiedade no públiku ida-ne’e,” nia dehan

Jornalista : Osoria Marques

Editór      : Cancio Ximenes

iklan
iklan

Leave a Reply

iklan
error: Content is protected !!