iklan

DILI

Parlamentu Nasionál kontinua fó prioridade ba asuntu jéneru

Parlamentu Nasionál kontinua fó prioridade ba asuntu jéneru

Sekretária Estadu ba Igualdade no Inkluzaun, akompaña hosi Inan feton sira tau ai-funan iha ponte kais Dili hodi komemora loron nasionál feto Timor-Leste, kinta (03/11). Imajen Tatoli/António Daciparu.

DILI, 03 novembru 2022 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, hateten Parlamentu Nasionál (PN) kontinua fó prioridade ba asuntu jéneru nune’e bele empodera partisipasaun feto hotu-hotu hodi kontribui ba dezenvolvimentu nasionál.

Prezidente Parlamentu Nasionál, Deputadu Aniceto Longuinhos Guterres Lopes. Imajen Tatoli/Sérgio da Cruz.

“Parlamentu Nasionál kontinua tau prioridade ba asuntu jéneru hodi empodera partisipasaun feto no diskrimina konduta sira-ne’ebé taka dalan ba feto sira hodi kontribui ba dezenvolvimentu nasionál,” Prezidente Parlamentu Nasionál hateten bainhira partisipa loron nasionál feto, iha Sentru Konvensaun Dili (CCD-sigla portugés), kinta ne’e.

Presiza hatutan asuntu kona-ba jéneru hodi aumenta pursentu feto partisipa iha hosi hakna’ar an iha instituisaun Estadu no Governu nian inklui iha Parlamentu Nasionál.

“Prezidente PN orgullu tebes tanba haree ba persentajen númeru kadeira iha asuntu parlamentár feto nian iha kinta legislatura ida-ne’e, ita iha deputadu hamutuk na’in-26,” nia hateten.

Tanba liuhusi aumentu feto nia partisipasaun mak bele motiva no enkoraja liután feto atu esforsu nune’e kontribui ba dezenvolvimentu nasionál.

“Ho asentu parlamentar ne’ebé aumenta sei motiva ita-nia feto sira iha Timor-Leste atu empodera liután feto sira-nia partisipasaun,” nia dehan.

Iha 20 fulan-jullu 2022, liuhusi rezulusaun 29/2022, ratifika adezaun ba konvensaun direitu ema ho defisiénsia nian no rezulusaun refere atu haforsa liután promosaun ba defisiente sira tantu feto no mane.

Ida-ne’e garante liután sira-nia direitu kona-ba liberdade fundamentál ne’ebé konsagra iha Konstituisaun Repúblika Demokrática Timor-Leste, iha artigu 21 kona-ba “Sidadaun ne’ebé iha defisiénsia”, iha alinea 1 hateten sidadaun ne’ebé iha defisiénsia fíziku eh mentál iha direitu no mós obrigasaun hanesan sidadaun sira seluk, maibé sira sei la hala’o kna’ar hirak ne’ebé sira labele hala’o tanba de’it sira-nia defisiénsia.

Iha alinea 2 haktuir, Estadu, wainhira bele, promove protesaun ba sidadaun sira-ne’ebé iha defisiénsia, tuir lei haruka.

Jornalista : Osoria Marques

Editór       : Cancio Ximenes

iklan
iklan

Leave a Reply

iklan
error: Content is protected !!