Top

PR Horta hasoru malu ho komunidade timoroan iha Portugál

Prezidente Repúblika, José Ramos Horta, hasoru malu ho Timoroan sira iha Portugál. Imajen/Midia PR.

DILI, 03 novembru 2022 (TATOLI)—Prezidente Repúblika (PR), José Ramos Horta, akompaña hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno no Embaixadora Timor-Leste ba Portugál, Isabel Guterres, hala’o enkontru ho komunidade timoroan iha Portugál hodi atualiza situasaun polítika no ekonomia iha Timor-Leste.

Komuniade timoroan iha Portugál simu Prezidente Repúblika, José Ramos Horta, ho tebedai. Imajen/Midia PR.

Xefe Estadu aprezenta balansu kona-ba prosesu harii Estadu durante tinan 20 nia laran, no problema oioin iha setór ekonomia, edukasaun no problema sosiál ne’ebé presiza rezolve ho didi’ak.

Iha enkontru ne’ebé hala’o iha Embaixada Timor-Leste iha Lisboa, Xefe Estadu esplika mós ba timoroon sira kona-ba vizita ba Portugál, hodi hametin liután lasu kooperasaun bilaterál ho Estadu Portugál, inklui hametin relasaun ho nasaun sira seluk iha kontinente Europeia, Áfrika no Ázia.

“Adezaun Timor-Leste ba ASEAN nu’udar pasu importante ba polítika Timor-Leste, hodi hametin kooperasaun politíka, ekonomia ho nasaun sira hotu, inklui Europeia, Áfrika no nasaun seluk tan,” Prezidente Repúblika hateten liuhosi komunikadu imprensa ne’ebé Agéncia Tatoli asesu, kinta ne’e.

Antes ne’e, Xefe Estadu hala’o vizita ba Kamboja hodi husu mós apoiu polítika ba adezaun Timor-Leste nian ba ASEAN iha tempu besik.

Tuir Xefe Estadu, durante tinan lima sei hametin liután kooperasaun Timor-Leste ho nasaun sira hotu, hodi hadi’a hikas imajen polítika no ekonomia Timor-Leste ba mundu atu manan konfiansa no haforsa prosesu dezenvolvimentu Timor-Leste nian.

Laureadu Prémiu Nobel da Paz ne’e  husu atu timoroan  sira kontinua fó apoiu ba polítika Governu Timor-Leste iha aspetu hotu-hotu.

PR agradese mós timoron sira-ne’ebé hala’o estudu iha Portugál atu kontinua fó tempu hodi estuda ho didi’ak no destaka kona-ba susesu estudante nian ida hosi Eskola Portugeza Ruy Cinatti, ne’ebé manán kompetisaun mundiál iha matemátika.

Iha fatin hanesan, Embaixadora Timor-Leste ba Portugál, Isabel Guterres, mós agradese primeiru vizita Xefe Estadu nian, tanba fó tempu hala’o enkontru ho komunidade timoroan iha Portugál.

Daudaun ne’e, Embaixada Timor-Leste kontinua koopera ho timoroan  sira, liu-liu buka rezolve problema sira-ne’ebé kuaze ema na’in 5.000 liu hasoru iha Portugál.

Enkontru Xefe Estadu nian ne’e hetan partisipasaun másimu hosi timoroan sira-ne’ebé hela no hala’o estudu no serbisu hodi reprezenta Timor-Leste iha Portugál .

Reprezentante Komunidade timoroan, Manuel Abrantes, ne’ebe hela iha Portugál sente orgullu, tanba vizita Xefe Estadu nian ne’e fahe mós hanoin ba sira kona-ba situasaun iha Timor-Leste no ajuda mós timoroan sira iha Portugál hodi kontribui ativamente ba dezenvolvimentu nasionál.

Manuel Abrantes mós preokupa ho Timor-Leste nia problema ekonomia no falta rekursu umanu, hodi implika adezaun Timor-Leste ba ASEAN.

Iha parte seluk, timoroan no Eis Prezidente Tribunál Rekursu, Claudio Ximenes, husu ba Estadu Timor-Leste atu halo revizaun ba lei sira iha Timor-Leste, liu-liu lei kombate korrupsaun hodi haforsa papel Estadu, hodi luta kontra korrupsaun iha Timor-Leste.

Notísia Relevante: PR Horta partisipa abertura konferénsia Websummit ba dala-22 iha Lisboa

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!