iklan

DILI, HEADLINE, POLÍTIKA

PR Horta partisipa abertura konferénsia Websummit ba dala-22 iha Lisboa

PR Horta partisipa abertura konferénsia Websummit ba dala-22 iha Lisboa

Prezidente Repúblika, José Ramos Horta, partisipa iha abertura Websummit 2022, hanesan eventu teknolójiku importante liu iha mundu ho partisipante rihun 70, inklui mos dirijente, sientista sira, start ups no seluk tan. Imajen/Míia PR.

DILI, 03 novembru 2022 (TATOLI)—Prezidente Repúblika (PR), José Ramos Horta, akompaña hosi Ministra Negósiu Estranjeiru no Kooperasaun (MNEK), Adaljiza Magno no Embaixadora Timor-Leste ba Portugal, Isabel Guterres, iha tersa (01 novembru 2022) ne’e, partisipa abertura konferénsia teknolójia, empreendedorizmu, Websummit ba dala-22 iha Lisboa, Portugál.

Xefe Estadu  konsidera,  eventu teknolójiku ne’e importante liu iha mundu ho partisipante hosi ema 70.000 mai hosi nasaun 165 no expositór na’in- 2630 no investidor no ema riku boot sira na’in-1,120 no oradór 1000 liu.

Prezidente Repúblika, José Ramos Horta, partisipa iha abertura Websummit 2022 ba dala-22 iha Lisboa-Portugál. Imajen/Míia PR.

“Ohin ha’u mai haree de’it, abertura konferénsia teknolójia, empreendedorismu Websummit ba dala-22 ne’ebé ema 70.000 partisipa iha nee’e. Ha’u kuñese ema lubuk ida, investidór ho osan boot ne’ebé ha’u ko’alia ba sira kona-ba oinsá Timor-Leste sai hanesan web rejional  ida ita tenke investe ba dijitalizasaun  teknolójia  no intelijénsia artifisiál, tanba Timor iha kualidade atu hola parte ho kabu submarinuu ne’ebé sei dada ba Timor-Leste,” Xefe Estadu hateten liuhosi komunikadu imprensa ne’ebé Agéncia Tatoli asesu, kinta ne’e.

Tuir Xefe Estadu, bainhira Timor-Leste investe makaas iha teknolójia dijitál bele  lori Timor-Leste hametin mos nia parseira ho nasaun belun sira iha mundu tomak, liu-liu nasaun sira iha rejiaun besik malu iha kontinente Ázia.

“Ha’u mai iha ne’e sei ko’alia ho sira hakarak dada sira riku boot no investidór boot bele ba Timor investe iha ne’eba no sira hotu-hotu tenke kuiñese Timor no ba Timor hodi halo vizita no haree oportunidade negósiu iha Timor-Leste,” Horta hateten.

PR Horta elojia konferénsia websummit ba dala-22 ne’ebé Estadu Portugál halo hametin mos kooperasaun ho nasaun tomak iha mundu hodi hola parte iha konferénsia ne’e.

Konferénsia ida-ne’e foka ba teknolójia internet, teknolójia foin mosu no benefísiu hosi kapitalizmu ne’ebé Timor-Leste presiza liu, atu akompaña no kompreende iha dezenvolvimentu iha nível mundiál.

Timor-Leste, maske ho populasaun 60% hanesan joven, la bele sees hosi dezenvolvimentu teknolójiku liu-liu relasiona ho intelijénsia artifisiál.

Tuir planu iha kinta (03 novembru), PR Horta sei sai oradór prinsipál hodi reprezenta Timor-Leste hodi hato’o nia palestra ba ema hotu iha mundu kona-ba pozisaun Timor-Leste, hola parte iha konferénsia websummit ba dala-22 no vizita paviliaun hodi haree hikas ekipamentu teknolójia modernu ne’ebé ejiste iha mundu tomak.

Notísia Relevante: Portugál-TL serbisu hamutuk kria kondisaun ba timoroan sira iha Lisboa

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!