iklan

DILI, POLÍTIKA

TL-Portugál sei solusiona imigrante timoroan sira-nia problema ho dalan legál

TL-Portugál sei solusiona imigrante timoroan sira-nia problema ho dalan legál

Prezidente Repúblika, José Ramos Horta, ho Prezidente Repúblika Portugál, Marcelo Rebêlo de Sousa, kuarta ne’e (02 novembru 2022) hasoru malu ho imigrante timoroan iha Portugál. Imajen/Mídia PR.

DILI, 03 novembru 2022 (TATOLI)—Prezidente Repúblika José Ramos Horta, ho Prezidente Repúblika Portugál, Marcelo Rebêlo de Sousa, kuarta ne’e (02 novembru 2022) hasoru malu ho imigrante timoroan ne’ebé hamahan an provizóriu iha Pavilliaun Polísia Munisipál Lisboa.

Prezidente Repúblika, José Ramos Horta ho nia ómologu hosi Portugál, Prof. Dr. Marcelo Rebelo de Sousa hala’o dialogu ho imigrante Timoroan iha Paviliaun Polisia Munisipal Lisboa. Imajen/Mídia PR.

Sidadaun hirak ne’e maiória toba iha jardim, tanba diskonfia sai vítima ba ajénsia fa’an billete ne’ebé la onestu, tanba promete atu hetan kedas serbisu no hela fatin bainhira to’o iha Portugál, no ho promesa ne’e foinsa’e sira foti risku hodi balun empresta ema-nia osan, atu bele hola billete inklui nesesidade seluk tan ho objetivu bele to’o iha Portugál.

Nakait ho asuntu ida-ne’e, Prezidente Portugál, Marcelo Rebelo de Sousa ne’ebé hetan ona informasaun antes, husu informasaun klara atu fó solusaun.

“Ha’u-nia pregunta,  imi simu informasaun hosi sé mak konsege mai to’o Portugál, imi hatene mai iha ne’e atu hala’o saida,” Xefe Estadu Portugál ne’e kestiona liu-hosi komunikadu imprensa ne’ebé Agéncia Tatoli asesu, kinta ne’e.

Maske kestiona, maibé ho expresaun triste, sidadaun hirak ne’e kontinua defende an hodi dehan, la’o ho hakarak rasik, seluk hatán katak prosesu trata dokumentu nasionalidade ne’ebé tarde iha Embaixada Portugál iha Timor-Leste mak obriga sira foti risku.

Konsiente katak, maske la onestu maibé Xefe Estadu rai rua ne’e. Portugál no Timor-Leste, nafatin hatudu espíritu domin no aprezenta opsaun hanesan, prontu fasilita sira-ne’ebé hakarak fila inklui buka dalan ba sira-ne’ebé hakarak mantein.

“Ho domin, ami laran haksolok mai iha ne’e reprezenta Estadu rua (Portugal-Timor-Leste), ha’u hakarak halo boasvindas lori Estadu no povu Portugés nia naran, hamutuk ho Prezidente Ramos Horta hodi buka rezolve imi-nia situasaun sira hotu tuir regra hodi realiza imi-nia mehi,”  Marcelo Rebelo hato’o liu hosi nota refere.

PR Marcelo agradese hamutuk ho PR Timor-Leste, Ramos Horta bele rona direta situasaun timoroan sira, hodi Estadu rua solusiona problema no fasilita timoroan ne’ebé hakarak serbisu iha Portugál no fasilita sira-ne’ebé hakarak fila ba Timor-Leste.

Prezidente Repúblika Fatin hanesan, PR Ramos Horta agradese bá nia omólogu Marcelo Rebelo ne’ebé hatudu domin hodi hamutuk tun direta halo diálogu ho foinsa’e timoroan sira.

“Avo Marcelo uniku prezidente ida iha mundu ne’ebé hatudu nia fuan boot no domin ba ita Timor-Leste, hodi tun direta mai buka solusaun ba imi-nia problema, tanba ne’e ha’u husu ba imi labele tauk, ami sei buka solusaun,” PR Horta hateten.

Horta mós orienta ona autoridade seguransa Timor-Leste atu loké prosesu investigasaun ba ajénsia ilegál sira-ne’ebé bosok timoroan sira hodi ba serbisu iha Portugál hodi prosesa tuir dalan legál.

Iha Fatin hanesan Reprezentante Timoroan, Luís Ximenes hosi Munisípiu Aileu, agradese ba Xefe Estadu rua nia domin hodi tun direta hasoru sira.

“Ami grupu lubun ida liu osi ajénsia sira promete ba ami dehan ba Portugál serbisu iha, maibé realidade to’o iha ne’e laiha ema ida mak fasilita ami, tanba ne’e ami moris abandona hela iha ne’e. Ho ida-ne’e ami agradese ba PR Ramos Horta no Prezidente Marcelo Rebêlo bele tun direta mai rona ami-nia preokupasaun hodi bele solusiona ami-nia problema,” Luís Ximenes dehan.

Nia husu atu Estadu bele fasilita sira trata dokumentu hanesan narativa, pasaporte no seguransa sosiál, nune’e sira bele kompleta sira-nia dokumentu atu bele serbisu iha Portugál.

Iha parte seluk, PR Ramos Horta apela ba timoroan hirak ne’e kontinua  koopera no hatudu komportamentu di’ak ho pasiénsia, tanba Estadu Portugés esforsu hela atu buka solusaun ba situasaun refere.

Xefe Estadu ne’e dehan, parte Governu no autoridade seguransa Timor-Leste sei kontinua halo kontrolu makas hodi evita timoroan sira seluk labele sai tan vítima.

Diálogu Xefe Estadu rua ho imigrante Timoroan sira-ne’e, akompaña direta hosi Ministra Negosiu Estranjeru no Kooperasaun, Adaljiza Magno (MNEK)  no Embaixadora Timor-Leste ba Portugal, Isabel Amaral Guterres no Embaixadora Portugal ba Timor-Leste, Manuela Bairos no reprezentante Governu Portugés.

Daudaun ne’e timoroan hamutuk na’in- 200 resin mak provizoriamente sei hela iha Pavilliaun Polísia Munisipál Lisboa Portugál no hetan asisténsia hosi Governu Portugál liu hosi Protesaun Sivíl Lisboa, no fó tratamentu saúde ba sira, hela fatin, hahán, no seluk tan hodi hein Estadu rua hakotu sira-nia problema.

Notísia Relevante: PR Horta hasoru malu ho komunidade timoroan iha Portugál

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!