DILI, 03 novembru 2022 (TATOLI)—Jerente Universidade da Paz (UNPAZ) halo ona aprezentasaun kona-ba kondisaun kampus ramu Rejiaun Administrativa Espesiál Oé-cusse Ambeno (Ambeno) no Suai ba Ministériu Ensinu Superiór Siénsia no Kultura (MESSK) hodi bele hetan lisensa operasionál iha futuru.
“Ministru ho ninia ekipa téknika sira bolu ona ami ba halo aprezentasaun ein jerál kona-ba ami-nia kampus ramu rua,” Reitór UNPAZ, Adolmando Amaral, hateten ba Agência Tatoli iha kampus UNPAZ, Ai-mutin, kinta ne’e.
Nia dehan, esplikasaun sira ne’e presiza hetan avaliasaun nune’e ministériu bele haree besik kondisaun no bele apár ho esplikasaun sira ne’ebé maka universidade aprezenta ona.
Notísia relevante: UNPAZ hein lisensa operasionál kampus ramu Oé-cusse no Covalima
MESSK iha tempu besik sei haruka ekipa ida halo avaliasaun ba kampus ramu rua ho intensaun atubele konfirma kondisaun reál.
“Ministru promete ona mai ami katak tempu besik sei iha ekipa ida haree hikas filafali ami-nia dokumentu ne’ebé submete relasiona ho kampus rua ne’e inklui atu konfirma kondisaun iha terrenu,” nia akresenta.
Daudaun iha mudansa kona-ba prosesu atu hetan lisensa operasionál kompara ho tempu uluk ne’ebé Ajénsia Nasionál Avaliasaun Akreditasaun Akadémiku (ANAAA) mak lidera, nune’e bainhira kada instituisaun ensinu superiór atu loke programa estudu ka kampus ramu foun tenke submete proposta ba ANAAA inklui kompleta padraun 10 no indikadór 56.
“Bainhira sira haree kompleta ona mak foin ANAAA forma avaliadór hodi tuun ba halo avaliasaun, maibé ninia prosesu rigorozu duni tanba ekipa avaliadór sira sei hasoru ema barak ne’ebé iha relasaun ho instituisaun ka kampus. Ba oportunidade agora iha diferensa boot, katak ba halo de’it aprezentasaun ida iha ministériu hafoin ekipa ida sei tuun ba halo avaliasaun no ikus mai rezultadu bele sai ona. Bainhira ida-ne’e maka akontese duni entaun avaliasaun ne’e sei la rigorozu,” nia tenik.
Jornalista : Tomé Amado
Editora : Julia Chatarina
