DILI, 02 setembru 2022 (TATOLI)–Universidade da Paz (UNPAZ) hamutuk ho Fundasaun Neon Metin halo ona diskusaun hodi prepara simu desizaun hosi Ministériu Ensinu Superiór Siénsia no Kultura (MESSK) nian, ne’ebé sei akontese iha loron 17 setembru kona-ba destinu kampus ramu Oé-cusse no Covalima ninia ensinu aprendizajen.
Reitór UNPAZ, Adolmando Amaral, hateten, prosesu ne’e daudaun tama ona iha komunikasaun entre UNPAZ no MESSK, tanba parte universidade sentrál hato’o ona proposta ba ministériu atu husu avaliasaun ba kampus ramu rua ne’e.
“Ekipa téknika hosi MESSK agora haree hela parte ne’ebé maka ami prienxe iha padraun 11 ne’e, nune’e bainhira kompleta hotu ona maka ami-nia kampus ramu rua bele hetan ona lisensa,” Reitór informa ba Agência Tatoli, iha kampus UNPAZ, sesta ne’e.
Notísia relevante: UNPAZ sei kompleta rekezitu atu hetan lisensa operasionál ba klase paralela
Aleinde ne’e, UNPAZ halo ona diskusaun iha senadu fakuldade hamutuk ho fundasaun iha loron 01 setembru no tuir planu diskusaun ikus ho ekipa téknika hosi ministériu sei realiza iha loron 17 setembru tinan ne’e, atu nune’e bele hetan lisensa operasionál ba kampus ramu rua.
“Durante ne’e ami halo hela preparasaun atu hetan lisensa operasionál ba kampus ramu rua ne’e. Ekipa téknika hosi MESSK mós husu ba UNPAZ atu loke tan departamentu foun hanesan Turizmu no Petróleu iha kampus ramu Oé-cusse no Covalima,” nia akresenta.
Enkuantu, daudaun universidade privada ne’e iha ona fakuldade neen no departamentu 20 iha kampus sentrál inklui kampus ramu Oé-cusse no Covalima, maibé seidauk hanoin atu loke tan departamentu foun tanba sei hasoru limitasaun ho rekursu umanu.
“Ami presiza diskute iha senadu uluk, hafoin bele foti desizaun. Di’ak liu UNPAZ mantein lai ho departamentu ne’ebé iha ona tanba ami lakohi loke maibé laiha rekursu sufisiente. Entaun bele fó fali impaktu ba prosesu sira tuir mai, di’ak liu ita kontinua lai ho buat ne’ebé iha ona hodi halo preparasaun di’ak liután,” Reitór dehan.
Jornalista : Tomé Amado
Editora : Julia Chatarina
