DILI, 03 novembru 2022 (TATOLI)—Prezidente Konsellu Konbatente Libertasaun Nasionál (CCLN-sigla portugés), Vidal de Jesus ‘Riak Leman’, hateten verifikasaun dadus veteranu rejistadu 2009 atinje ona 90% tanba hela postu administrativu tolu hosi munisípiu Baucau no Ermera mak seidauk finaliza.
“To’o agora, ita-nia verifikasaun ne’e atinje ona 90% tanba hela postu administrativu Railaco, munisípiu Ermera nian no postu rua seluk hosi Baucau mak seidauk konklui,” Riak Leman hateten ba Agência Tatoli liuhusi telefónika, kuarta ne’e.
Nia dehan, bainhira konklui hotu verifikasaun ne’e, sei halo validasaun ba dokumentu hafoin taka sai lista naran rejistadu ba ida-idak nia munisípiu.
“Ita tenke konklui iha tinan ne’e, nune’e ita bele kontinua fali halo verifikasaun ho lista pendente veteranu rejistadu 2003 ho 2005 nian,” nia dehan.
Tuir nia, lista pendente hosi veteranu rejistadu 2003 ho 2005 nian ne’e hamutuk 6,177 iha territóriu nasionál.
Veteranu sira iha territórriu nasionál ne’ebé rejistadu iha tinan 2009 ne’e hamutuk ema na’in-124,680.
Liuhosi konteúdu ne’ebé mensiona iha Estatutu Kombatente Libertasaun Nasionál, lei númeru 3/2006, no artigu 13 hateten Registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekuiñesimentu Kombatente hanesan Libertasaun Nasionál ne’ebé rejista iha tinan 2009.
Notísia Relevante: Verifikasaun dadus veteranu rejistadu 2009 atinje ona 78%
Jornalista : Osoria Marques
Editór : Cancio Ximenes
