iklan

EDUKASAUN, HEADLINE

Akordu tripartidu atu fasilita kooperasaun programa merenda eskolár

Akordu tripartidu atu fasilita kooperasaun programa merenda eskolár

Ministru Edukasaun Juventude no Desportu, Armindo Maia (karuk), Representante WFP iha Timor-Leste (klaran) no Ministru Administrasaun Estatál, Miguel Pereira de Carvalho (loos) asina akordu kooperasaun tripartidu ba programa merenda eskolár iha salaun Hotel Timor, sesta (04/11). Imajen Tatoli/António Daciparu

DILI, 04 novembru 2022 (TATOLI)–Ministériu Edukasaun Juventude no Desportu (MEJD), Ministériu Administrasaun Estatál (MAE) no Nasaun Unida, sesta ne’e, asina memorandu entendimentu tripartidu atu fasilita kooperasaun programa merenda eskolár atu hadi’a saúde eskolár no nutrisaun estudante sira.

“Liuhosi kooperasaun entre Programa Ai-han Mundiál (WFP, sigla portugés) no Governu Timor-Leste, ita asegura katak sei fornese merenda eskolár nutritivu no saudável iha territóriu nasionál. Ida-ne’e hanesan ita-nia devér hodi fó apoiu ba labarik sira no eskola atubele apreende ho di’ak, hodi iha kreximentu no dezenvolvimentu di’ak liuhosi programa merenda eskolár ho modelu desentralizasaun iha munisípiu sira,” Ministru Edukasaun Juventude no Desportu, Armindo Maia, hateten, iha ámbitu serimónia iha salaun Hotel Timor.

Espesífikamente programa merenda eskolár sei fó apoiu tékniku ba polítika no estratejia nasionál monitorizasaun no avaliasaun inklui halo introdusaun ba fortifikasaun ai-han iha programa nasionál ne’e rasik.

Akordu ho durasaun tinan-tolu, hahú tinan ne’e to’o 31 dezembru 2025.

Notísia relevante: Governu aprova programa merenda eskolár

Iha biban hanesan, Ministru Administrasaun Estatál, Miguel Pereira de Carvalho, konsidera akordu tripartidu sei fasilita investimentu importante ba labarik sira ho idade eskola iha territóriu nasionál atubele hadi’a di’ak liután kondisaun nutrisaun no edukasaun.

“Ha’u komprometidu hakarak kombate inseguransa ai-han no má-nutrisaun ba populasaun vulnerável sira, liu-liu ba labarik sira ho idade eskola hodi reforsa Governu lokál nia kapasidade,” nia tenik.

Nune’e mós, Reprezentante programa merenda eskolár hosi WFP, Cecilia Garzon, hateten, WFP sei kontinua apoiu hodi reforsa kapasitasaun ba MEJD no MAE ba programa merenda eskolár ne’ebé foku ba modelu desentralizasaun.

Nia konsidera, ho inisiativa ne’e bele mellora programa ne’ebé WFP introdús ona desde tinan 2005 no iha tinan 2011, MEJD foti responsabilidade, ne’ebé ikus mai transforma fali ba programa nasionál hanaran merenda eskolár, administra hosi unidade merenda eskolár dedikada.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!