iklan

EKONOMIA, HEADLINE

Alfándega arrekada reseita millaun $75,3 iha janeiru to’o outubru 2022

Alfándega arrekada reseita millaun $75,3 iha janeiru to’o outubru 2022

Osan Dolar Amérika. Imajen/Espesiál

DILI, 04 novembru 2022 (TATOLI)-Autoridade Aduaneira (AA)/Alfándega arrekada reseita hamutuk millaun $75,3 hahú hosi fulan-janeiru to’o outubru 2022 ba kofre Estadu.

“Montante ne’e ultrapasa koleksaun reseita Aduaneira iha tinan 2021 ho montante totál millaun $67,9. Tuir projesaun hosi Autoridade Aduaneira, to’o iha tinan ne’e nia rohan bele atinje millaun $90,” refere nota ne’ebé Agência Tatoli asesu, sesta ne’e.

Fonte reseita ne’e maioria mai hosi pontu entrada sira hanesan portu, aeroportu, fronteira terrestre Batugade no Salele, munisípiu Covalima.

Ho mudansa operasaun hosi Portu Dili ba Portu Baía Tibar, fó kondisaun servisu di’ak liután ba AA hodi bele kontribui hasa’e reseita doméstika mai kofre Estadu hodi redús dependénsia ba fundu minarai.

Notísia relevante: Alfándega iha sistema instaladu kontrola materiál plástiku importadu

Operasaun Portu Baía Tibar ne’ebé hahú ona desde 30 setembru liubá fasilita liután movimentu importasaun no esportasaun sasán ho kapasidade karga kontentór hamutuk millaun ida kada tinan. Portu foun ne’e inklui kais ida ho bersu rua ne’ebé sei uza hodi redús atrazu iha tempu hasai kontentór inklui kustu tranzasaun atu fasilita efisiénsia servisu alfándega no atividade komérsiu.

Nune’e, efisiénsia hirak ne’e konsidera hanesan pasu importante ida ba Ministériu Finansa iha ámbitu reforma fiskál no jestaun finansa públika inklui efisiénsia ne’e rasik ajuda koleta refeita ho maneira lalais, justu no transparente.

Daudaun ne’e Ministériu Finansa implementa hela polítika reforma fiskál no jestaun finansa públika. Iha inísiu tinan oin, VIII Governu Konstitusionál sei avansa ho lei tributária, lei impostu valór akresentadu, título tezouru (T-Bills) no instrumentu fiskál sira seluk.

Aleinde ne’e, iha proposta OJE 2023 ne’ebé nia debate sei hahú iha semana oin, Governu propoin ba Parlamentu Nasionál atu hasa’e impostu importasaun hosi 2,5% sa’e ba 5% no impostu seletivu konsumu sira seluk atu fó kbiit ba AA no Autoridade Tributária hodi bele hasa’e reseita doméstika, halakon evazaun fiskál no mellora efikásia iha administrasaun kolesaun reseita.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!