Alfándega iha sistema instaladu kontrola materiál plástiku importadu
DILI, 04 fevereiru 2022 (TATOLI)—Autoridade Aduaneira (AA)/Alfándega hola parte halo kontrolu sasán importasaun hosi pontu entrada sira, liuliu liga ho implementasaun polítika zero plástiku, iha sistema rasik hodi regula entrada materiál plástiku.
“Bainhira ita halo konfigurasaun iha sistema ne’e, iha tempu importadór submete dokumentu, sistema sei alerta kona-ba item sira ne’ebé mak relasiona ho plástiku, no tempu ne’ebá kedan bainhira mosu item sira ne’ebé ho materiál plástiku, automátikamente ita ba halo inspesaun fízika,” Komisáriu AA/Alfándega, José António Fátima Abílio, hateten ba Agência TATOLI, iha ninia knaar fatin, Palásiu Governu, sesta ne’e.
Notísia relevante: Embalajen tipu styrofoam hahú lakon iha Timor-Leste
Nune’e, durante prosesu mak Alfándega nota iha materiál plástiku 100%, sei apreende sasán ne’e hodi koordena ho Sekretaria Estadu Ambiente (SEA) hodi halo destroisaun, enkuantu sira ne’ebé sei autoriza, ekipa responsável sei husik tama.
“Maibé durante ne’e plástiku ilegál kontinua tama tanba maluk sira ne’ebé importa sasán sikat le’et hela plástiku sira ne’e ho sasán seluk to’o sistema tarjetu ne’e mak matak sira liu ona,” nia akresenta.
Nune’e, dalan ilegál seluk ne’ebé kontinua la’o mak bainhira tempu kalan ema tula sasán inklui plástiku ho ró kiik sira, entaun plástiku ne’ebé mak Governu bandu kontinua sirkula.
Intensaun Governu halo polítika a zero plástiku tanba iha previzaun katak plástiku bele estraga ambiente.
“Nune’e ita-nia parte kontinua halo kontrolu ba importasaun plástiku ilegál sira, iha kategoria materiál plástiku 100% ita hapara, maibé balun ita sei autoriza tama hanesan OXO-BIOdegradável plástiku d2w, to’o períodu determinadu sei hapara,” nia dehan.
Desde implementasaun Dekretu-Lei númeru 37/2020 loron 23 setembru kona-ba alienasaun, importasaun no produsaun saku, embalajen no objetivu seluk ba plástiku, Alfándega halo kontrolu ba importasaun plástiku uzu úniku no bee-hemu embalajen plástiku.
“Ita rekoñese iha lakuna balun ne’ebé mak Alfádega iha ein termu kontrolu, tanba ita hatene katak atividade ilegál sira kontinua la’o, maibé tenta nafatin nune’e bele prevene importasaun plástiku sira,” nia tenik.
Komisáriu Alfándega konsidera polítika zero plástiku di’ak hodi labele estraga ambiente, tanba ne’e presiza reforsa kontrolu ba sasán importasaun.
“Ita iha alternativu ida hodi prevene, hanesan bee-hemu kopu ita tenke buka ona alternativu saida mak bele substitui tanba ema balun laiha kapasidade atu sosa bee-hemu boot, nune’e implementasaun ne’e gradualmente ita tenke diminui hodi hein mós ita-nia produsaun lokál bele responde ba merkadu,” nia dehan.
Enkuantu, durante kontrolu dezafiu ne’ebé Alfándega hasoru mak item plástiku importasaun hamutuk 800, maibé koñesimentu pesoál Alfándega mak limitadu.
“Tanba ne’e ami presiza kontinua halo formasaun ho SEA, nune’e sira bele koñese di’ak liután klasifikasaun ba plástiku sira ne’e atubele ajuda sira halo kontrolu iha pontu entrada sira ne’e,” José António tenik.
Jornalista : Arminda Fonseca
Editora : Julia Chatarina
