iklan

DILI, POLÍTIKA

Komisaun A submete relatóriu paresér alterasaun lei Organizasaun Judisiária ba meza PPN

Komisaun A submete relatóriu paresér alterasaun lei Organizasaun Judisiária ba meza PPN

Prezidente Komisaun A, Deputada Joaquim dos Santos. Imajen Tatoli/Francisco Sony

DILI, 04 novembru 2022 (TATOLI)—Komisaun A trata asuntu Justisa no Konstituisional submete ona relatóriu no paresér ba meza Prezidente Parlamentu Nasionál (PPN) kona-ba projetu-lei númeru 47/V(4a)-alterasaun dahuluk lei Organizasaun Judisiária.

“Komisaun A haruka ona relatóriu no paresér alterasaun lei Organizasaun Judisiária nian ba meza Parlamentu no agora hein de’it ajenda,” Prezidente Komisaun A, Joaquim dos Santos ‘Boraluli’, informa ba Agéncia Tatoli, sesta ne’e.

Relatóriu paresér komisaun nian ba inisiativa lejislativa ne’e tuir tramisaun legál no iha nesesidade atu altera, nune’e hein ajenda hosi meza PN hodi kontinua diskusaun iha plenária faze jeneralidade.

Alterasaun ne’e haree atu rezolve komisaun instaladora atu rekruta júri ba Supremu Tribunál Justisa (STJ) no Tribunál Rekursu iha lei vijente ne’ebé aprova tinan kotuk iha klauza tranzitória ida la konsege implementa prazu liu tiha nune’e presiza emenda.

Proposta iha artigu rua hosi lei vijente mak sei emenda no adita tan artigu foun ida, hanesan iha artigu 77 kona-ba komisaun nia tempu instalasaun ne’e no artigu 83 kompeténsia komisaun nian ne’ebé artigu rua ne’e sei haree didi’ak.

Sai mós matéria diskusaun iha artigu aditamentu ida atu rekonsidera nomeasaun sira-ne’ebé uluk Parlamentu ho Prezidente Repúblika anteriór nomea.

Tuir Lei Númeru 25 /2021, 02 dezembru, kona-ba Lei Organizasaun Judisiária iha artigu 77 (Instalasaun tribunál judisiál), iha alinea 1 hateten Supremu Tribunál Justisa instaladu prazu másimu fulan 24, sura hosi  prezente lei tama iha vigór.

Iha alínea 2 ne’e haktuir, Tribunál Rekursu instaladu prazu másimu fulan 24, konta hosi prezente lei tama iha vigór.

Iha artigu 83 (Komisaun Rekrutamentnu no Selesaun), iha alínea 1 hateten prazu másimu loron 45 hafoin prezente lei tama vigór, Prezidente Repúblika nomea hosi dekretu Komisaun Rekrutamentu no Selesaun ba primeiru provimentu dos Lugares de juízes Supremu Tribunál Justisa no provimentu dos lugares de juiz Tribunál Resursu.

Iha alinea 2 haktuir, komisaun prevista iha númeru anteriór kompostu sidadaun nasionál na’in-tolu. Iha alínea 2 a).  Ida indika hosi Prezidente Repúblika, preside; b). Rua indika hosi Parlamentu Nasionál, propostu hosi bankada parlamentár, forma uninominál, eleitu eskrutíniu sekretu hosi deputadu PN.

Hosi artigu ne’e iha alínea 5 hateten kompete komisaun, iha  ámbitu primeiru provimentu dos lugares de juízes ba STJ no provimentu dos lugares de juízes TR, kontratasaun júri, realiza avaliasaun dokumentál ba ezame avaliasaun no entrevista profisionál kandidatu.

Antes ne’e, Prezidente Tribunál Rekursu, Deolindo dos Santos, hateten TR hetan konvite atu fó paresér alterasaun dahuluk lei Organizasaun Judisiária.

Komisaun prepara projetu alterasaun iha artigu rua ka tolu ko’alia kona-ba prazu atu STJ no TR, ho prazu previstu iha lei atuál fulan 24 maibé signifika tinan rua ho balun prazu ne’e depois fulan hitu hotu tiha seidauk bele halo buat ida.

Nune’e, tuir nia, haree ba rekursu umanu ne’ebé iha entermu númeru juiz, infraestrutura, presiza mós altera diploma prosesuál kódiku prosesu penál no kódiku sívil ho lei sira seluk.

“Tan ne’e, ami-nia paresér husu atu bele prazu fulan 30 hotu maibé susesiva, signifika harii uluk tiha SJT kompleta tiha mak harii fali TR hodi bele fó solusaun di’ak ba Estadu haree ba situasaun tékniku ho realidade hasoru,” nia hateten.

Entertantu, alterasaun lei refere antes ne’e komisaun hala’o audiénsia ho entidade sira hanesan Ministéiru Justisa (MJ), Tribunál Rekursu (TR), Prokuradória Jerál Repúblika (PJR) ho Defensóra Públika hodi rona mós sira-nia hanoin.

Notísia Relevante: Komisaun A ho entidade relevante hahú diskute alterasaun lei organizasaun judisiária

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!