iklan

EDUKASAUN, HEADLINE

MEJD estabelese ona sentru 21 ba programa eskola iha uma

MEJD estabelese ona sentru 21 ba programa eskola iha uma

Labarik sira iha suku Bebonuk akompaña hosi família, partisipa programa eskola iha uma hosi MEJD, iha sede suku Bebonuk (24/08). Imajen Tatoli/Francisco Sony

DILI, 04 novembru 2022 (TATOLI)—Ministériu Edukasaun Juventude no Desportu (MEJD) estabelese ona sentru 21 hodi realiza programa ‘eskola iha uma’ ba dahuluk iha munisípiu Dili.

Diretór Nasionál Edukasaun Pre-eskolár, Tomas do Rosário, haktuir, antes ne’e iha ona sentru lima no agora aumenta tan 16.

“Ita foin estabelese tan sentru 16 iha suku sira ne’ebé iha área leste, nune’e tau tan ho sentru lima ne’ebé antes ita forma ona iha suku rua parte weste nian hamutuk sentru 21 maka estabelese ona,” Diretór informa ba Agência Tatoli iha ninia knaar fatin, MEJD, Vila Verde, sesta ne’e.

Notísia relevante: MEJD harii ona sentru lima apoiu eskola iha uma

Maski nune’e, Diretór ne’e seidauk simu dadus detallu kona-ba suku sira ne’ebé estabelese ona sentru 16 maibé iha tempu besik bele rekolla ona dadus fixu kona-ba suku ne’ebé de’it maka instala ona sentru eskola iha uma inklui estudante ne’ebé sei partisipa iha programa.

“Ha’u foin simu dadus sentru 16 foun ne’ebé estabelese ona iha suku parte leste nian, ha’u seidauk iha dadus suku inklui estudante rejistadu maibé ha’u garante semana ne’e dadus bele tama hotu ona,” nia akresenta.

Programa VIII Governu ne’ebé implementa hosi MEJD kona-ba eskola iha uma nu’udar maneira ida atu hakbesik liután eskola ba komunidade.

“Tanba ne’e, programa eskola iha uma implementa ba labarik sira hosi nível edukasaun pre-eskolár no ensinu báziku primeiro ano. Programa ne’e sei foku liu ba labarik sira ne’ebé la asesu ba edukasaun nível rua ne’e tanba distánsia eskola dook hosi hela fatin,” nia tenik.

Tuir planu MEJD hakarak forma sentru hamutuk 444 iha aldeia 222 iha munisípiu Dili, ne’ebé karik la konsege atinje meta bele to’o de’it sentru 100 resin.

Jornalista   : Tomé Amado  

Editora        : Julia Chatarina

iklan
iklan

Leave a Reply

iklan
error: Content is protected !!